मुख्य समाचार

चिकित्सा शिक्षा आयोगमा सदस्यहरु नियुक्त, उपाध्यक्ष कहिले ?

None

काठमाडौं-

काठमाडौं-  सरकारले राष्ट्रिय चिकित्सा शिक्षा आयोगमा सदस्यहरु नियुक्त गरेको छ। मन्त्रीपरिषद्को माघ २९ गते बसेको बैठकले आयोगमा सदस्यहरु नियुक्त गरेको हो।

प्रधानमन्त्री तथा मन्त्रीपरिषद कार्यालयका अनुसार सरकारले डा सिर्जना श्रेष्ठ, डा जगदिश प्रसाद अग्रवाल, नेपाल नर्सिङ संघकी अध्यक्ष तारा पोखरेल, नेपाल चिकित्सक संघका अध्यक्ष डा मुक्तिराम श्रेष्ठ, एसोसिएसन अफ हेल्थ प्रोफेसन्स एजुकेशनिष्ट अफ नेपालका अध्यक्ष डा शेखरबाबु रिजाल, विशेष अदालतका पूर्व अध्यक्ष गौरीबहादुर कार्की र स्वास्थ्य मन्त्रालयकी पूर्व सचिव विजया केसीलाई सदस्यका रुपमा नियुक्त गरेको छ।

सरकारले शिक्षण संस्थाको नियमन गर्न र चिकित्सा शिक्षालाई गुणस्तरीय बनाउन चिकित्सा शिक्षा आयोग बनाएको हो ।

डा गोविन्द केसीका माग र माथेमा कार्यदलको सुझाबका आधारमा सरकारले ‘राष्ट्रिय चिकित्सा शिक्षा अध्यादेश’ ल्याएको थियो । अध्यादेश गत कार्तिक २४ गते राष्ट्रपतिबाट प्रमाणिकरण भएको थियो।

अध्यादेशमा प्रधानमन्त्रीको अध्यक्षतामा आयोग गठन हुने व्यवस्था छ । 

आयोगमा शिक्षा र स्वास्थ्य मन्त्री सहअध्यक्ष रहने छन् । यस्तै, राष्ट्रिय योजना आयोगका शिक्षा र स्वास्थ्य हेर्न सदस्य, चिकित्सा शिक्षा कार्यक्रम सञ्चालन भएका विश्वविद्यालय र प्रतिष्ठानका उपकुलपति, शिक्षा र स्वास्थ्य सचिव, विश्वविद्यालय अनुदान आयोगका अध्यक्ष, प्राविधिक शिक्षा तथा व्यावसायीक परिषद्का उपाध्यक्ष, नेपाल मेडिकल काउन्सिल, नर्सिङ काउन्सिल, आयूर्वेद काउन्सिल, नेपाल स्वास्थ्य व्यवसायी परिषद्, नेपाल फार्मेसी काउन्सिलका अध्यक्षहरु सदस्य रहने छन् ।

यी बाहेक सरकारले मनोनित गर्नुपर्ने सदस्यहरुलार्इ भने नियुक्त गरेको प्रधानमन्त्री कार्यालयले जनाएको छ।

आयोगको कार्यकारी अधिकार उपाध्यक्षमा रहने व्यवस्था छ । अध्यादेशमा चिकित्सा शिक्षामा विशिष्ट योगदान पुर्‍याएका चिकित्साहरुमध्येबाट सरकारले उपाध्यक्ष नियुक्ती गर्ने व्यवस्था छ ।

आयोगको उपाध्यक्षमा नाम सिफारिस गर्न तीन सदस्यीय समिति बनाइएको छ। लोकसेवा आयोगका अध्यक्षको संयोजकत्वमा रहेको समितिले हालसम्म उपाध्यक्षको नाम सिफारिस गरेको छैन।

प्रतिकृया दिनुहोस

प्राप्त प्रतिकृयाहरू

यसमा तपाइको मत



पढ्नै पर्ने