मुख्य समाचार

किर्तिपुर नगरमा स्वयंसेविकाले नै रक्तचाप र मधुमेह परीक्षण गर्ने


काठमाडौं-

किर्तिपुर नगरपालिकाले स्थानीय महिला स्वास्थ्य स्वयंसेविकालाई रक्तचाप र मधुमेह परीक्षणको तालिम दिएको छ । नसर्ने रोगको प्रकोप न्युनिकरणको पहल अन्तर्गत नगरपालिकाले  उनीहरुलाई तालिम दिएको हो। 

नगरमा रहेका १ सय १३ मध्ये ६० जना परीक्षण गर्न सक्ने स्वयंसेविका छनोट गरी उक्त तालिम दिइएको नगरपालिकाका स्वास्थ्य शाखा प्रमुख धनबहादुर थापाले जानकारी दिएका छन् । उनका अनुसार यस किसिमको जानकारी हासिल गर्न इच्छुक स्वयंसेविकालाई उक्त तालिम दिइएकाले कार्यक्रम प्रभावकारी हुने अपेक्षा गरिएको छ।

‘स्वयंसेविकाहरुले टोलछिमेककाहरुको नियमित रक्तचाप र मधुमेह जाँच गर्नेछन् । जसमा यी समस्याको सम्भावना वा जोखिम देखिन्छ उनीहरुले चिकित्सकीय परामर्शका लागि पठाउनेछन्,’ शाखा प्रमुख थापाले भने । उक्त जाँच गराइमाग्न आउनेहरुदेखि विभिन्न आमा समूह, क्लबहरु र भेलामा पुगेर स्वयंसेविकाले परीक्षण गर्नेछन् । नगरपालिकाले तालिम प्राप्त स्वयंसेविकाहरुलाई परीक्षणका सामाग्री उपलब्ध गराउनेछ।

परीक्षणपछि उनीहरुले त्यसको रेकर्ड राख्नेछन् । उक्त रेकर्डबाट नगरपालिकालाई स्वास्थ्य सम्बन्धि योजना बनाउन सहयोग पुग्ने अपेक्षा नगर प्रमुख रमेश महर्जनको छ । नसर्ने रोग विश्वव्यापी रुपमा समस्या बन्दै गइरहेकाले नगरवासीमा यस सम्बन्धि जनचेतना जगाउन र सचेत गराउन कार्यक्रम ल्याइएको उनी बताउँछन्। 

उच्च रक्तचाप र मधुमेहको मुख्य कारण जीवनशैली र खानपान भएकाले सचेतना फैलाएर न्युनिकरण गर्न सकिने स्वास्थ्य शाखा प्रमुख थापा बताउँछन् । उनी भन्छन्, ‘मधुमेह र उच्च रक्तचाप आफैंमा दीर्घ रोग मात्र नभइ धेरै रोगका कारक हुन् । त्यसैले हामीले यी दुईको परीक्षणलाई पहिलो प्राथमिकतामा राखेका हौं।’

केही समयदेखि नगरपालिकाले ७० वर्ष कटेकाहरुलाई उच्च रक्तचापको औषधि निःशुल्क वितरण गरिरहेको छ। 

प्रतिकृया दिनुहोस

प्राप्त प्रतिकृयाहरू

यसमा तपाइको मत



पढ्नै पर्ने