विश्व स्वास्थ्य

निपा भाइरसबाट मृत्यु हुनुअघि केरलाकी नर्सले पतिलाई लेखिन् हृदयविदारक पत्र

 

‘म आफ्नो बाटो जाँदैछु, हाम्रा छोराछोरीको ख्याल गर्नुहोला,’ केरलाकी ३१ वर्षीया नर्स लिनि पुथुसेरीले अस्पतालको आइसोलेसन युनिटबाट आफ्नो पतिलाई लेखिन् । जीवनको अन्तिम समयमा उनले न परिवारलाई देख्न पाइन्, न उनका छोराछोरीले आमा देख्न पाए । उनी बिरामी भएको खबर सुनेपछि उनका पति साजीस दुई दिनअघिमात्रै खाडी मुलुकबाट भारत आएका थिए । संक्रमण अरुलाई फैलन नपाओस् भनेर निधनलगत्तै उनको अन्त्येष्टि गरियो ।

केरलाको कोझिकोदे अस्पतालमा निपा भाइरसका बिरामीको उपचारमा खटिएकी नर्स लिनिको त्यही भाइरसले नै ज्यान लियो ।

नर्स लिनिले छोराछोरीको राम्रो हेरचाह गर्न आग्रह गर्दै पतिलाई लेखेको पत्रमा भनेकी छन्, ‘साजिस, म आफ्नो बाटो जाँदैछु, सायद अब मैले तिमीलाई देख्न पाउँदिन । मलाई माफ गर । छोराछोरीको राम्रो हेरचाह गर । उनीहरुले एक्लो महसुस गर्न नपरोस्  । धेरै–धेरै माया ।’

अहिले उनको यो पत्र सामाजिक सन्जालमा भाइरल भैरहेको छ, जसका कारण धेरैको आँखामा आँशु झरेको छ ।

‘नर्स लिनिले निपा भाइरसविरुद्धको लडाईंको क्रममा मृत्युवरण गरिन्, संक्रमित बिरामीलाई बचाउने प्रयास गर्दागर्दै उनको मृत्यु भयो । ३१ वर्षकी उनका २ बच्चा छन्,’ चिकित्सकको नेटवर्क डेलीराउण्डका प्रमुख कार्यकारी डा. दीपु सेविनले ट्वीट गर्दै भनेका छन् । 

केरलाको मुख्यमन्त्री पिनारायी विजयनले पनि नर्स लिनि पुथुसेरीको स्वार्थरहित सेवालाई सदा सम्झिइने उल्लेख गरेका छन्  ।

पिराम्बरा अस्पतालले नर्सको निधनलगत्तै अन्त्येष्टि गरिएको पुष्टि गरेको छ । केरलाको स्वास्थ्य विभागले निपा भाइरसबाट अहिलेसम्म ५ जनाको मृत्यु भएको जनाएको छ । तीमध्ये एकै परिवारका तीनजना छन् । केरलाको कोझीकोदे नजिकैको मालाप्पुरममा उच्च ज्वरोका कारण करिब एक दर्जन मानिसको मृत्यु भैसकेको छ । यस्तै कोझीकोदे मेडिकल कलेज अस्पतालमा उच्च ज्वरोका कारण थप दुई नर्स भर्ना भएका छन् । 

कस्तो हो निपा भाइरस ? 

निपा भाइरस चमेरोबाट सर्छ । यसका संक्रमितमा श्वासप्रश्वासमा कठिनाई, मष्तिष्क सुन्निने, उच्च ज्वरो, टाउको दुख्ने, रिङगटा लाग्नेजस्ता लक्षण देखिन्छन् । संक्रमित भएको ४८ घण्टामै बिरामी कोमामा जान सक्छन् । बिरामीसँग प्रत्यक्ष सम्पर्कबाट यो रोग सर्छ । 

विश्व स्वास्थ्य संगठनका अनुसार निपा भाइरसको भ्याक्सिन अहिलेसम्म छैन । यसको मुख्य उपचार भनेकै ‘इन्टेन्सिभ सर्पोटिभ केयर’ मा राख्नु हो । निपा भाइरसको संक्रमण फैलन थालेपछि केरलामा उच्च सतर्कता अपनाइएको छ । प्रभावित कोझीकोदोमा दुई नियन्त्रण कक्ष स्थापना गरिएको छ । राज्य सरकालाई सहयोगका लागि केन्द्रबाट टोली स्वास्थ्य टोली पनि पठाइएको छ ।   
 


 

प्रतिकृया दिनुहोस

प्राप्त प्रतिकृयाहरू

यसमा तपाइको मत



पढ्नै पर्ने