काठमाडौं- एमबीबीएस अध्ययनका लागि चिकित्सा शिक्षा आयोगले लिने प्रवेश परीक्षामा नक्कली परीक्षार्थी बन्नेहरू किस्ट कलेजका विद्यार्थीदेखि भारतीय नागरिकसम्म रहेको खुलेको छ।
लामो निगरानी र सुक्ष्म अनुसन्धान पछि अपरेसन ‘इको’नाम दिएर महानगरीय प्रहरी अपराध महाशाखाले गरेको अपरेसनमा नक्कली परीक्षार्थी बनेकाहरुमध्ये तीन जना किस्ट कलेजका विद्यार्थी रहेको खुलेको छ।
चैत १८, २० र २१ गते सञ्चालन हुने एकीकृत प्रवेश परीक्षामा नक्कली परीक्षार्थी सहभागी हुने गरेको सूचना आएपछि महाशाखाले निगरानी बढाएको थियो। जसअनुसार १८ गते पाँच जनालाई पक्राउ गरी कारबाहीका लागि महानगरीय प्रहरी परिसर टेकु र ललितपुरमा पठाएको छ।
भारतीयदेखि एमबीबीएस तेस्रो वर्षमा अध्ययनरत विद्यार्थी समेत पक्राउ
नक्कली परीक्षार्थी बनेर परीक्षा दिएको आरोपमा प्रहरीले पाँच जनालाई पक्राउ गरेको छ। पक्राउ पर्नेहरुमा भारतीय नागरिकदेखि एमबीबीएस तेस्रो वर्षमा अध्ययनरत विद्यार्थीसम्म रहेको महाशाखाका एसएसपी वसन्त कुवँरले बताए।
कोटेश्वरस्थित ग्रामर स्कुल परीक्षा केन्द्रबाट सप्तरीको राजगढ गाउँपालिका–१ का २६ वर्षीय राम आशिष यादव पक्राउ परेका थिए। रकम लिएर अरुको परीक्षा दिने यादव किस्ट कलेजमा एमबीबीएस तेस्रो वर्षमा अध्ययनरत विद्यार्थी हुन्।
उनले रुपन्देहीको ओमसतिया गाउँपालिका–३ का २० वर्षीय स्मित सिंहको नामबाट परीक्षा दिएका थिए। स्मितको प्रवेशपत्रमा आफ्नो फोटो टाँसेर यादवले परीक्षा दिएको प्रहरीको दाबी छ। उनी पटक पटक नक्कली परीक्षार्थी भएको समेत अनुसन्धानबाट खुलेको छ। उनले नक्कली परीक्षार्थीको रुपमा बी फार्मेसीको समेत परीक्षा दिने तयारी गरेको पाइएको छ।
उनीसँगै किस्ट कलेजमा अध्ययनरत तीन जना विद्यार्थी पक्राउ परेका छन्। किस्टमा एमबीबीएस प्रथम वर्षमा अध्ययनरत २२ वर्षीय विद्यार्थी अमर पण्डितलाई नक्कली परीक्षार्थी बनेर परीक्षा दिँदै गरेको अवस्थामा ललितपुरस्थित सीसीआरसी कलेजबाट पक्राउ गरिएको हो।
पूर्वसूचना अनुसार उनलाई रेकी र सोधपुछ गरेपछि पण्डितले पुरै परीक्षा समेत नदिई परीक्षा हलबाट निस्केका थिए। प्रहरीसमक्ष पण्डितले भनेका छन्, ‘नक्कली होरहोइन भनेर पहिल्यै केरकार भएकाले डरले पुरै परीक्षा नै नदिई निस्केका हुँ।’
महोत्तरीको सम्सी–४ का पण्डितले धनुषाको जनकपुर उपमहानगरपालिका–१४ का २१ वर्षीय वृकेश यादवको नामबाट परीक्षा दिएका थिए।
सर्लाहीको चक्रघट्टा–४ का २२ वर्षीय रामनाथ चौधरी एमबीबीएस अध्ययनरत नक्कली परीक्षार्थी हुन्। किस्ट कलेजमै एमबीबीएस पहिलो वर्षमा अध्ययनरत चौधरीले धनुषाको अन्दुपट्टी गाउँपालिका–१ का २२ वर्षीय आजिव कुमार यादवको नाममा परीक्षा दिएको खुलेको छ। उनलाई पनि सीसीआरसी कलेजस्थित परीक्षा केन्द्रबाट नियन्त्रणमा लिइएको हो।
नक्कली परीक्षार्थी बनेर एमबीबीएसको परीक्षा दिन भारतदेखि काठमाडौंसम्म आएका व्यक्ति समेत समातिएका छन्। भारत बिहार औरगंबाद, रफिगञ्जका २४ वर्षीय इस्तियाख अहमद पनि पक्राउ परेका हुन्। उनले महोत्तरीको सम्सीका २३ वर्षीय सन्नीकुमार साहको नामबाट परीक्षा दिएका थिए। अहमदलाई एमबीसन कलेज मध्यबानेश्वरबाट पक्राउ गरिएको हो।
खेताला खोजर आफ्नो नाममा परीक्षा दिन लगाउने सन्नी पनि समातिएका छन्। बाँकी तीन जना भने फरार रहेकाले उनीहरुलेको खोजी भइरहेको प्रहरीले जनाएको छ। मुद्दा बुझाउने बेलासम्म पक्राउ नपरे फरार प्रतिवादी बनाएर मुद्दा लगिने प्रहरीले जनाएको छ।
१८ लाखसम्म शुल्क
नक्कली परीक्षार्थी बनेर परीक्षा दिनेहरुले १८ लाख रुपैयाँसम्म असुली गर्ने गरेको महाशाखाका प्रवक्ता तथा एसपी कृष्ण कोइरालाले जानकारी दिए। जस्ट पास भएकाहरुबाट ५ लाख रुपैयाँसम्म लिने सर्तमा नक्कली परीक्षार्थी बनेर परीक्षा दिने गरेको खुलेको छ।
त्यसैगरी, निश्चित रकम तिरेर एमबीबीएस अध्ययनरत गर्न पाउने गरी नाम निस्केकाहरुले १० लाख रुपैयाँसम्म दिनुपर्ने सर्तमा परीक्षा दिने गरेको खुलेको छ।
फ्रि स्कलरसीपमा नाम निस्केकाहरुले भने नक्कली परीक्षार्थीलाई १८ लाख रुपैयाँसम्म दिनुपर्ने सर्तमा परीक्षा दिइएको खुलेको हो। पास भएपछि बाँकी रकम लिने सर्तमा एड्भान्सको रुपमा ५० हजार रुपैयाँदेखि २ लाख रुपैयाँसम्म शुल्क लिएर परीक्षा दिइएको पाइएको छ।
चिकिस्ता क्षेत्रमा कार्यरत चिकिस्तसकहरुले समेत एमबीबीएस पढिरहेका तर आर्थिक अवस्था कमजोर भएका जेहेन्दार विद्यार्थीलाई विभिन्न प्रलोभन देखाएर नक्कली परीक्षार्थीको रुपमा प्रयोग गर्ने गरेको पाइएको एसपी कोइरालाले बताए।
प्रवेशपत्रदेखि नागरिकता समेत कीर्ते
नक्कली परीक्षार्थी बनेर परीक्षा दिनका उनीहरुले प्रवेशपत्रदेखि नागरिकता समेत कीर्ते गरेको खुलेको छ। क्रस चेक हुने सम्भावना भएको र नागरिकतामा भएको फोटोसँग मेल खुवाउनका लागि उनीहरुले नागरिकता समेत कीर्ते गरेको खुलेको एसपी कोइरालाले बताए।
सक्कली परीक्षार्थीको प्रवेशपत्र र नागरिकतामा भएको फोटो उप्काएर नक्कली परीक्षार्थीको फोटो टाँस गरी स्ट्याम्प समेत हानेर हुबहु बनाउने प्रयास गरिएको प्रहरीले जनाएको छ।
यसरी सरकारी तथा सार्वजनिक कागजात कीर्ते गरेकाले उनीहरुविरुद्ध सार्वजनिक लिखत सम्बन्धीको कसूरमा म्याद लिएर अनुसन्धान प्रक्रिया अघि बढाइने प्रहरीले जनाएको छ। अर्कोतर्फ चिकित्सा शिक्षा ऐन पनि आकर्षित हुने भएकाले सो अनुसार पनि कारबाही प्रक्रिया अघि बढ्ने प्रहरीले जनाएको छ।
