काठमाडाैं- गत वैशाख तेस्रो सातायता नेपालमा हरेक दिन करिब आठ हजार संख्यामा कोरोना संक्रमित थपिँदै आएका थिए। दैनिक पीसीआर परीक्षण संख्या करिब २० हजार हाराहारी हुँदा सातदेखि साढे नाै हजारसम्म नयाँ संक्रमित पहिचान भएका थिए।
वैशाख २८ गते एकै दिन हालसम्मकै सबैभन्दा बढी, नाै हजार ४८३ संक्रमित थपिएको तथ्यांक छ। उक्त दिन २० हजार ५९६ जनाको पीसीआर परीक्षण गर्दा उक्त संख्यामा संक्रमण पुष्टि भएको थियो।
आइतबार जम्मा तीन हजार ७०२ जना संक्रमित थपिएको स्वास्थ्य तथा जनसंख्या मन्त्रालयले जानकारी दिएको छ। उक्त तथ्यांकले कोरोना संक्रमणदर ह्वात्तै घटेको हो कि भन्ने देखाउँछ।
तर, वास्तविकता त्यस्तो छैन। कोरोना संक्रमितको संख्या एक्कासी घट्नुको पछाडि संक्रमणदर घटेका कारण नभई पीसीआर परीक्षण कम हुनु रहेको छ।
स्वास्थ्य मन्त्रालयले आइतबार सार्वजनिक गरेको तथ्यांकमा दैनिक पहिचान हुने संक्रमितको संख्या करिब ५० प्रतिशतले घटेको देखाउँछ। र, पीसीआर परीक्षण पनि ५० प्रतिशतकै हाराहारीमा घटेको छ। जसकारण संक्रमित कम देखिएको मन्त्रालयको तथ्यांकबाट पुष्टि हुन्छ।
पछिल्लो १० दिनको तथ्यांक हेर्दा पीसीआर परीक्षण संख्या क्रमश: घट्दै गएको देखिन्छ। जेठ ७ गते २२ हजार ३५३ जनाको पीसीआर परीक्षण गरिएकोमा जेठ १६ मा आइपुग्दा यो संख्या १० हजार ९८६ मा झरेको छ। जेठ ७ को तुलनामा जेठ १६ मा भएको पीसीआर परीक्षण संख्या ११ हजार ३६७ न्यून हो।
जेठ ७ मा गरिएको पीसीआर परीक्षणबाट आठ हजार ४०७ जनामा संक्रमण पुष्टि भएको थियो। जुन जेठ १६ मा चार हजार ७०५ संख्याले घटेर तीन हजार ७०२ मा झरेको छ।
यो तथ्यांकले संक्रमितको संख्या घट्नुमा पीसीआर परीक्षण कम हुनु नै मुख्य कारण देखाउँछ। संक्रमणदर अझ पनि ३० प्रतिशतभन्दा माथि नै रहेको छ। आइतबारको संक्रमणदर ३३.७० प्रतिशत रहेको छ। जेठ ७ मा यस्तो दर ३७.६१ प्रतिशत थियो।
पछिल्लो चार दिनकै तथ्यांक हेर्ने हो भने पनि पीसीआर परीक्षण संख्या क्रमश: घट्दै आएको देखिन्छ। पीसीआर परीक्षण जेठ १३ मा २० हजार ४१४, जेठ १४ मा १९ हजार ३१३, जेठ १५ मा १४ हजार ६ हुँदै जेठ १६ मा १० हजार ९८६ मा झरेको छ।
पीसीआर परीक्षण घट्दा स्वत: नयाँ संक्रमितको संख्या पनि घट्न पुगेको तथ्यांक छ। जसअनुसार जेठ १३ मा छ हजार ७३१, जेठ १४ मा छ हजार ८५५, जेठ १५ मा चार हजार ३११ र जेठ १६ मा तीन हजार ७०२ संक्रमित पहिचान भएका छन्।
पछिल्लो चार दिन (जेठ १३-१६) को संक्रमणदर क्रमश: ३२.९७ प्रतिशत, ३५.४९ प्रतिशत, ३०.७८ प्रतिशत र ३३.७० प्रतिशत रहेको छ।
यी तथ्यांकले नेपालमा कोरोना संक्रमणको जोखिम अझै उच्च विन्दुमा नै रहेको प्रस्ट देखाउँछ। स्वास्थ्यविदहरुले पनि कोरोनाको जोखिम कायमै रहेको बताउँदै आएका छन्। कोरोनाको दोस्रो लहरबाट आक्रान्त बनिरहँदा तेस्रो लहर फैलनसक्ने भन्दै उनीहरुले सतर्कता अपनाउन अनुरोध गर्दै आएका छन्।
तर, कोरोना संक्रमण रोकथाम तथा नियन्त्रण गर्न प्रभावकारी काम गर्न नसकेको भन्दै आलोचित बनिरहेको सरकारले संक्रमित कम देखाउन पीसीआर परीक्षणदर घटाएको हुनसक्ने आकलन गरिएको छ। जुन तथ्यांकहरुबाट समेत पुष्टि हुने देखिन्छ।
