विषय: स्वास्थ्य क्षेत्रका निम्न समस्याहरू समाधानका लागि पहल गरिदिनुहुन।
महोदय,
तल उल्लेखित समस्याहरू स्वास्थ्यकर्मीहरूले वर्षौंदेखि भोग्दै आएका हुन्। यिनका सम्बन्धमा हामीले पटक–पटक आवाज उठाए पनि हालसम्म पर्याप्त सुनुवाइ भएको छैन। त्यसैले वर्तमान सरकारबाट यी समस्याहरूलाई गम्भीरतापूर्वक लिई समाधानका लागि आवश्यक पहल गरिदिनुहुनेछ भन्ने हामीले आशा राखेका छौँ।
१) सबै निजी, सामुदायिक तथा सरकारी संस्थामा कार्यरत करार तथा अस्थायी स्वास्थ्यकर्मीहरूको तलब सरकारी स्केलसरह बनाउने निर्णय तत्काल कार्यान्वयन गरी यसको कडा अनुगमन गरियोस्। साथै, कुनै पनि संस्थाले तोकिएको तलब स्केल तथा अन्य सुविधा नदिएमा कडा कारबाहीको व्यवस्था गरियोस्।
२) लोकसेवा आयोगको पदपूर्ति प्रक्रियामा सुधार गरियोस्। देशभरका सबै स्वास्थ्य संस्थाबाट यथाशीघ्र रिक्त पदहरूको विवरण संकलन गरी प्रमाणीकरण पश्चात् पदपूर्तिका लागि व्यापक विज्ञापन गरियोस्। साथै, परीक्षार्थीहरूले विभिन्न प्रदेशमा धाउनुपर्ने बाध्यता अन्त्य गर्न सातै प्रदेशमा एकै समयमा परीक्षा सञ्चालन गर्ने व्यवस्था मिलाइयोस् र एउटै एकीकृत पाठ्यक्रम लागू गरियोस्।
३) कार्यरत स्वास्थ्यकर्मीका लागि निश्चित कार्यघण्टा (Work Hour) लागू गरी यसको कडाइका साथ अनुगमन गरियोस्। तोकिएको भन्दा बढी समय काम लगाउने, बिरामी–स्वास्थ्यकर्मी अनुपात नमिलाउने, तथा समयमा तलब/सुविधा उपलब्ध नगराउने संस्थालाई कडा कारबाहीको दायरामा ल्याइयोस्।
४) स्वास्थ्य क्षेत्रसँग सम्बन्धित सबै दलगत संगठनहरू खारेज गरी सम्पूर्ण स्वास्थ्यकर्मीहरूको हकहितका लागि कार्य गर्ने एक मात्र निष्पक्ष संगठन गठन गरियोस्।
५) स्थानीय तहमा स्थापित आधारभूत अस्पतालहरूको संरचनामा अहेव, अनमी, ल्याब असिस्टेन्ट लगायत चौथो तहका स्वास्थ्यकर्मीहरूको पद समावेश गरी नयाँ संगठन संरचना (Organogram) तयार गरियोस्।
६) अन्तरप्रदेश सरुवाको व्यवस्था गरियोस्। संघ, प्रदेश तथा स्थानीय तहका कर्मचारीबीच समान व्यवहार र अधिकार सुनिश्चित गर्दै आवश्यकता अनुसार सरुवा तथा बढुवाको अवसर उपलब्ध गराइयोस्।
७) लोकसेवा आयोगको पाठ्यक्रम सम्बन्धित सेवा र कार्यक्षेत्रसँग प्रत्यक्ष सम्बन्धित हुने गरी मात्र निर्धारण गरियोस्।
८) स्वास्थ्यकर्मीहरूले प्रदान गर्ने सेवा अवधि, जोखिम तथा संवेदनशीलताको आधारमा अन्य निजामती सेवाभन्दा उच्च न्यूनतम तलब स्केल निर्धारण गर्न पहल गरियोस्।
९) स्वास्थ्यकर्मीहरूको बढ्दो वैदेशिक पलायन रोक्न सेवा–सुविधामा सुधार गरी उनीहरूलाई प्रोत्साहन गर्ने नीति अवलम्बन गरियोस्।
१०) बिरामीहरूले भोगिरहेका समस्याहरूलाई प्राथमिकतामा राखी समाधान गरियोस्। गम्भीर बिरामीका लागि आवश्यक उद्धार सेवा सुनिश्चित गरियोस् र सबै स्वास्थ्य संस्थाहरूलाई सुविधासम्पन्न बनाउनेतर्फ विशेष कदम चालियोस्।
अन्त्यमा, यो हाम्रो बहुमतले बनेको सरकार भएकाले हामीले उठाएका मागहरूको उचित सुनुवाइ भई शीघ्र समाधान हुनेमा पूर्ण विश्वास व्यक्त गर्दछौँ।
भवदीय,
[तपाईंको नाम/संस्था]
