नेपाल मेडिकल काउन्सिलले सम्पूर्ण चिकित्सकहरुको ज्ञान र सिपलाई अझै परिस्कृत गर्न चिकित्सा सेवामा निरन्तर पेसागत उन्नयन कार्यक्रम (सिपिडी) कार्यान्वयनमा ल्याउन लागेको छ। काउन्सिलले उक्त कार्यक्रम लागू गर्न पहिलो चरणमा तालिमको कार्यक्रम सुरु गरेको छ। सिपिडीका विषयमा स्वास्थ्यखबरले श्रृंखलाबद्ध रुपमा सामाग्री प्रकाशित गर्दै आइरहेको छ। यसअघि ६ वटा श्रृंखला प्रकाशित भइसकेका छन्। सातौं श्रृंखलामा हामीले नेपाल चिकित्सक संघ र गैरसकारी चिकित्सक संघका महासचिवहरुको धारणा यहाँ समेटेका छौं :
निःशुल्क र सहज पहुँच हुनुपर्छ
डा लोचन कार्की, महासचिव नेपाल मेडिकल काउन्सिल
सिपिडी कार्यक्रम लागू गर्नु राम्रो हो। तर यो विषय लागू गर्दा हतार र आवश्यक तयारी पूरा नगरी भने गर्नु हुँदैन। काठमाडौं तथा सहरी क्षेत्रलाई मात्र आधार मानेर यो कार्यक्रम लागू गर्नु हुँदैन।
नेपालको भौगोलिक अवस्था, चिकित्सा शास्त्रमा भए–गरेका गतिविधि र पर्याप्त तयारीबिना सिपिडी कार्यक्रम पूर्ण रुपमा कार्यान्वयनमा आउन कठिन हुन्छ।
सिपिडी कार्यक्रम लागू भएपछि दूरदराज तथा ग्रामीण भेगमा कार्यरत डाक्टरहरुले पनि सहज रुपमा तालिमको पहुँच पाउनुपर्छ। सबैभन्दा महत्वपूर्ण कुरा सिपिडीका तालिमहरु निःशुल्क र सहज पहुँचमा हुनुपर्छ।
हतारमा र हचुवाका भरमा सिपिडी लागू गर्नु हुँदैन
डा रितेश थापा
महासचिव, गैरसरकारी चिकित्सक संघ
सिपिडी कार्यक्रम आफैंमा निकै राम्रो छ। तर अहिले नेपालको सन्दर्भमा यो कार्यक्रम लागू गर्ने बेला भएको छ कि छैन ? के हामी सिपिडी कार्यक्रम लागू गर्ने अवस्थामा पुगिसकेका छौं त ? यो विषयमा पहिला बहस हुन आवश्यक छ।
डाक्टरले सिपिडी कार्यक्रम लागू नभए पनि पढिरहेका छन्। जर्नलमा लेखिरहेका छन्। अपडेट भइरहेका छन्। चिकित्सकले पढेकै छैन, अपडेट नै हुँदैनन् भन्ने खालका गलत सन्देश अहिले बाहिर गइरहेको छ। त्यसकारण सिपिडी लागू भएपछि मात्र पढ्छन्, अपडेट हुन्छन् भन्ने सन्देश बाहिर जानु गलत हो।
अहिले नेपालमा डाक्टरको अभाव छ। यही समयमा फेरि डाक्टरलाई पेल्नेगरी कार्यक्रम ल्याउनुहुँदैन। पहिला हाम्रो अवस्था, परिवेश, तयारी, पूर्वाधारलगायतका सबै विषय हेर्नुप¥यो नि। हचुवाका भरमा कुनै तयारी नगरी कार्यक्रम लागू गर्नुहुँदैन।
काउन्सिलले पहिला मेडिकल कलेजको गुणस्तर बढाउने कुरामा ध्यान दिनुपर्छ। मेडिकल कलेजमा प्रवेश गराउँदा नै अब्बल विद्यार्थी मात्र छिर्ने वातावरण बनाउनेतिर लाग्नुपर्छ। कलेजमा फ्याकल्टी बढाउनेतर्फ पनि ध्यान दिनुपर्छ। खडेबाबा आउने समस्या छ, खै त्यतातिर ध्यान दिएको ? त्यसकारण पहिला मुहानमा नै सुधार गर्नेतर्फ ध्यान दिनुपर्छ जस्तो लाग्छ।
नेपालको दुर्गम क्षेत्रमा निकै कम स्रोत–साधनमा बसेर काम गर्नुपर्ने बाध्यता छ। सिपिडी नम्बर एक सय ल्याएका डाक्टरले सीमित स्रोत–साधन भएका स्थानमा नै गुणस्तरीय र प्रभावकारी सेवा दिन्छ भन्ने हुन्छ त ? त्यसकारण नेपालमा अहिले यो कार्यक्रम तत्कालै लागू गर्ने अवस्था आएको छैन।
यो पनि पढौं :
