हरेक उचाइको यात्रा एउटा सानो पाइलाबाट सुरु हुन्छ। त्यो पाइला कहिलेकाहीँ जोखिमपूर्ण हुन्छ, कहिलेकाहीँ अनिश्चित। तर जब त्यो पाइला सपना, विश्वास र दूरदर्शी सोचसँग जोडिन्छ, त्यसले केवल एउटा व्यवसाय होइन- एउटा प्रणाली निर्माण गर्छ। नेपालको स्वास्थ्य क्षेत्रमा यस्तै एउटा प्रेरणादायी कथा हो वेब ट्रेडिङ कन्सर्न प्रा. लि.को २५ वर्षे यात्रा।
सन् २००१ मा, जब नेपालमा आधुनिक स्वास्थ्य उपकरण र प्रविधिको पहुँच सीमित थियो, त्यही बेला उद्यमी रामईन्द्र न्यौपानेले एउटा फरक सोच अघि सारे- 'मेडिकल सामाग्री बेच्ने होइन, समाधान दिने।' यही सोचको जगमा स्थापना भएको वेब ट्रेडिङ कन्सर्न आज स्वास्थ्य प्रविधिको क्षेत्रमा भरोसायोग्य नामका रूपमा स्थापित भएको छ।
-1775270133.JPG)
संघर्षबाट निर्माण भएको विश्वास
सुरुवाती दिनहरू सजिला थिएनन्। सीमित स्रोत, कमजोर पूर्वाधार, प्राविधिक जनशक्तिको अभाव र चुनौतीपूर्ण बजार। यी सबैबीच कम्पनीले आफ्नो यात्रा थालेको थियो। तर कठिनाइहरूमै सम्भावना देख्ने दृष्टिकोणले यसलाई अघि बढायो। त्रिपुरेश्वरबाट सानोस्तरमा सुरु भएको यो प्रयास आज देशका करिब ७० जिल्लामा फैलिएको छ।
काठमाडौंबाट सुरु भएको सेवा विस्तार हुँदै विराटनगर, पोखरा, चितवन, गाईघाट, दमकलगायत सातै प्रदेशमा पुग्नु केवल विस्तार होइन- यो विश्वासको विस्तार हो। माकुरोको जालो जस्तै कम्पनीले सेवा, गुणस्तर र भरोसाका धागोले सम्बन्धहरू गाँस्दै गएको छ। एकपटक जोडिएका संस्थाहरू लामो समयसम्म साथमै रहनु यसको सबल प्रमाण हो।
-1775270284.png)
समाधानमुखी दृष्टिकोण
वेब ट्रेडिङ कन्सर्नको विशेषता यसको दृष्टिकोणमा छ। कम्पनीका संस्थापक रामईन्द्र न्यौपाने भन्छन्, 'हामीले उपकरण बेच्ने होइन, समस्याको समाधान दिने सोच राख्यौं। किनकि हरेक उपकरणसँग कसैको जीवन जोडिएको हुन्छ।'
यो विचारले कम्पनीलाई अन्यभन्दा फरक बनाएको छ। स्वास्थ्य उपकरण आपूर्ति केवल व्यापार होइन- यो जिम्मेवारी हो भन्ने बुझाइले कम्पनीले सेवा प्रवाह गरेको छ। अनुभवी इन्जिनियर, दक्ष प्राविधिक र समर्पित टिमले उपकरण जडानदेखि मर्मत र तालिमसम्म उच्चस्तरीय सेवा सुनिश्चित गरेका छन्।
विशेषगरी संवेदनशील उपकरणहरू- जहाँ जीवन र मृत्युको निर्णय जोडिएको हुन्छ- त्यहाँ कम्पनीको गम्भीरता झल्किन्छ। यही कारणले ग्राहकहरूमा दीर्घकालीन विश्वास कायम भएको छ।
विविध क्षेत्रमा प्रभाव
वेब ट्रेडिङ कन्सर्नले स्वास्थ्य सेवाका विभिन्न क्षेत्रमा आफ्नो उपस्थिति मजबुत बनाएको छ। इन–भिट्रो डायग्नोस्टिक्स (आईभीडी) देखि लिएर डिसइन्फेक्सन र स्टेरिलाइजेसन, डर्माटोलोजीदेखि क्रिटिकल केयरसम्म कम्पनीले व्यापक सेवा दिएको छ।
रोग निदान स्वास्थ्य सेवाको आधार भएकाले कम्पनीले आईभीडी क्षेत्रमा विशेष ध्यान दिएको छ। पछिल्लो २५ वर्षमा करिब ५०० भन्दा बढी साना तथा ठूला ल्याबहरूसँग सहकार्य गर्दै कम्पनीले सहरदेखि ग्रामीण क्षेत्रसम्म आफ्नो पहुँच विस्तार गरेको छ। सानो गाउँमा ल्याब स्थापना गर्न आवश्यक उपकरणदेखि लिएर राष्ट्रिय स्तरका ए-ग्रेड प्रयोगशालासम्म समाधान दिन सक्ने क्षमता विकास गर्नु यसको ठूलो उपलब्धि हो।
डर्माटोलोजी र एस्थेटिक क्षेत्रमा पनि कम्पनी अग्रणी छ। सन् २००१ देखि नै नेपालमा डर्मा लेजर प्रविधि भित्र्याउँदै आएको कम्पनीले सौन्दर्य र छाला उपचार सेवामा नयाँ आयाम थपेको छ। एफएमएस टेक्नोलोजी जस्ता आधुनिक प्रविधिले शरीर टोनिङ र एस्थेटिक सेवामा नवीनता ल्याएको छ।
त्यस्तै, अस्पतालजन्य फोहोर व्यवस्थापन, इन्डस्ट्रियल लन्ड्री सेटअप, हाइजिन र स्टेरिलाइजेसन क्षेत्रमा कम्पनीको योगदान उल्लेखनीय छ। स्वास्थ्य सेवा केवल उपचारमा सीमित हुँदैन भन्ने मान्यताका साथ कम्पनीले सरसफाइ र संक्रमण नियन्त्रणमा पनि काम गरेको छ।
प्रविधि भित्र्याउने हुटहुटी
निर्देशक न्यौपानेको भनाइ छ, 'नयाँ प्रविधि ल्याउने हुटहुटीले नै यहाँसम्म पुर्यायो।' यही उत्साहले कम्पनीलाई नवीनतामा विश्वास गर्नेका रुफमा पहिचान दिलाएको छ।
नेपालमा अस्पतालजन्य फोहोर व्यवस्थापन प्रणाली भित्र्याउने, अटोइम्युन रोग परीक्षणका लागि आईएफए प्रविधि सुरु गर्ने, र लेजर तथा हेयर ट्रान्सप्लान्ट प्रविधि ल्याउने काम कम्पनीका उल्लेखनीय उपलब्धिहरू हुन्। यी प्रविधिहरूले नेपालको स्वास्थ्य क्षेत्रमा गुणस्तरीय परिवर्तन ल्याएका छन्।
विश्वका २५ भन्दा बढी अन्तर्राष्ट्रिय साझेदारहरूसँग सहकार्य गर्दै कम्पनीले अत्याधुनिक प्रविधि नेपालमा ल्याएको छ। तर हरेक प्रविधि ल्याउँदा कम्पनीले आफैं एउटा महत्वपूर्ण प्रश्न सोध्छ- 'के यो समाजका लागि उपयोगी छ?' यही मूल्यांकनपछि मात्र प्रविधि प्रयोगमा ल्याइन्छ।
जनशक्ति र प्रविधिको सन्तुलन
स्वास्थ्य प्रविधि क्षेत्रमा उपकरण मात्र पर्याप्त हुँदैन- दक्ष जनशक्ति अनिवार्य हुन्छ। कम्पनीले बायोमेडिकल इन्जिनियर, ल्याब टेक्नोलोजिस्ट, माइक्रोबायोलोजिस्ट, नर्सिङ स्टाफ लगायत विभिन्न विधाका विशेषज्ञहरूलाई समेटेको छ।
यी जनशक्तिलाई अन्तर्राष्ट्रिय स्तरको तालिम प्रदान गरिन्छ। यसले कम्पनीलाई प्राविधिक रूपमा सक्षम मात्र होइन, प्रतिस्पर्धी पनि बनाएको छ। काठमाडौं, विराटनगर, दमक, पोखरा र चितवनमा रहेका सेवा केन्द्र राखेर सेवा उपलब्ध गराउनु कम्पनीको पहुँच र प्रतिबद्धताको उदाहरण हो।
स्वास्थ्य क्षेत्रमा परिवर्तनको साक्षी
पछिल्ला दुई दशकमा नेपालको स्वास्थ्य क्षेत्रमा उल्लेखनीय परिवर्तन आएको छ। पहिले सामान्य परीक्षणका लागि हप्तौं कुर्नुपर्ने अवस्था थियो भने अहिले केही घण्टामै रिपोर्ट उपलब्ध हुन्छ। सिटी स्क्यान, एमआरआई, आईसीयू, भेन्टिलेटर जस्ता सेवाहरू सहज रूपमा उपलब्ध छन्।
यस परिवर्तनमा निजी क्षेत्रको भूमिका महत्वपूर्ण छ, जसमा वेब ट्रेडिङ कन्सर्न जस्ता कम्पनीहरू अग्रपंक्तिमा छन्। प्रविधि, जनशक्ति र सेवा विस्तारका माध्यमबाट कम्पनीले स्वास्थ्य सेवाको पहुँच र गुणस्तर दुवै बढाएको छ।
दृढता, निष्ठा, नवप्रवर्तन र सामाजिक दायित्व
२५ औँ वर्ष पूरा गरेको अवसरमा कम्पनीले सामाजिक उत्तरदायित्वलाई पनि प्राथमिकता दिएको छ। काभ्रेको पनौतीस्थित सावित्री देवी स्मृति प्रतिष्ठानलाई २५ लाख रुपैयाँ सहयोग गर्ने घोषणा यसैको उदाहरण हो। शिक्षा र स्वास्थ्य क्षेत्रमा काम गर्ने संस्थालाई गरिएको यो सहयोगले समाजमा सकारात्मक प्रभाव पार्ने अपेक्षा गरिएको छ।
त्यस्तै, दीर्घकालीन सहकार्य गर्ने अस्पतालहरूलाई सम्मान र समर्पित कर्मचारीहरूलाई कदर गर्नु कम्पनीको संस्कार झल्काउने पक्ष हो। संस्थाको विकासमा योगदान दिने व्यक्तिहरूलाई सम्मान गर्नु यसको मूल्य प्रणालीको हिस्सा हो।
२५ वर्षको यात्रामा कम्पनीले १४०० भन्दा बढी उपकरण जडान गरेको छ, ५०० भन्दा बढी ल्याबसँग सहकार्य गरेको छ, र ७० जिल्लासम्म सेवा विस्तार गरेको छ। यी केवल संख्या होइनन्- यी विश्वासका प्रमाण हुन्।
दृढता, निष्ठा, नवप्रवर्तन र सामाजिक दायित्व- यी मान्यताहरूले वेब ट्रेडिङ कन्सर्नलाई यहाँसम्म ल्याएका छन्। यही आधारमा कम्पनीले भविष्यमा अझ व्यापक योगदान गर्ने लक्ष्य राखेको छ।
स्वास्थ्य सेवा क्षेत्रमा प्रविधिको भूमिका अझ बढ्दै जानेछ। यस्तो अवस्थामा गुणस्तरीय सेवा, विश्वसनीय साझेदारी र नवीन प्रविधिमार्फत कम्पनीले आफ्नो योगदानलाई अझ सुदृढ बनाउने निर्देशक न्यौपाने बताउँछन्।
'आज वेब ट्रेडिङ कन्सर्न प्रालि केवल उपकरण आपूर्ति गर्ने कम्पनी होइन। यो समाधान दिने संस्था हो, विश्वास निर्माण गर्ने माध्यम हो, र स्वास्थ्य सेवामा गुणस्तर उकास्ने अभियान हो,' उनी थप्छन्, 'किनकि हरेक उपकरणको पछाडि एउटा जीवन जोडिएको हुन्छ, र हरेक सेवाको पछाडि एउटा आशा। यही सत्यलाई आत्मसात गर्दै २५ वर्ष पार गरेका छौं।'
