काठमाडौं - नेपाल चिकित्सक संघ (एनएमए)को आसन्न निर्वाचनमा डा. अरुण उप्रेतीले सदस्य पदका लागि उम्मेदवारी घोषणा गरेका छन्। उनले अध्यक्षका उम्मेदवार डा. मंगल रावलको प्यानलबाट प्रतिस्पर्धा गर्ने जानकारी सामाजिक सञ्जालमार्फत सार्वजनिक गरेका हुन्।
उम्मेदवारी घोषणा गर्दै उनले एनएमएको प्रतिनिधित्व दायरा कमजोर भएकै कारण चिकित्सकका मुद्दा प्रभावकारी रूपमा उठ्न नसकेको बताए। 'देशभर ४५ हजार चिकित्सक भए पनि संघमा करिब १६ हजार मात्रै सदस्य छन्, जस मध्ये करिब ८ हजारले मात्र मतदान गर्छन्,' उनले उल्लेख गरे, 'थोरै प्रतिनिधित्व भएकाले चिकित्सकको आवाज बलियो हुन सकेको छैन। चिकित्सकको हक–अधिकार र जनताको स्वास्थ्य अधिकारका लागि संघ बलियो हुन आवश्यक छ।'
आफूले विगतमा चिकित्सक सुरक्षा र आवासीय चिकित्सकको हकहितका लागि सक्रिय रूपमा काम गरेको बताउँदै संघमा पुग्ने हो भने संस्थागत रुपमा अझ प्रभावकारी रूपमा काम गर्ने प्रतिबद्धता व्यक्त गरे।
