काठमाडौं- भोटेकोसी बाढीपछि घाइते भएका १६ जनाको त्रिशूली अस्पतालमा उपचार भइरहेको छ। अस्पतालका अनुसार तीमध्ये दुई जनाको अवस्था गम्भीर रहेको छ भने बाँकी १४ जना पहेँलो र हरियो समूहमा रहेका छन्।
त्रिशूली अस्पतालका निर्देशक डा. राजेन्द्र लामाका अनुसार गम्भीर अवस्थामा रहेका दुई जनालाई थप उपचारका लागि काठमाडौँ रेफर गर्ने तयारी भइरहेको छ। उनीहरूलाई हेलिप्याडमार्फत काठमाडौँस्थित ट्रमा सेन्टर पठाउने योजना रहेको उनले बताए। यसका लागि प्रमुख जिल्ला अधिकारी (सीडीओ) सँग समन्वय भइरहेको छ।
अस्पतालमा हाल करिब १५–१६ जना विशेषज्ञ चिकित्सक र सोही संख्यामा मेडिकल अफिसर निरन्तर उपचार सेवामा खटिएका छन्। बाढी प्रभावित क्षेत्रबाट घाइते ल्याउने क्रम जारी रहे पनि सडक तथा यातायात अवरुद्ध हुँदा अस्पतालसम्म घाइते ल्याउन समस्या भइरहेको डा. लामाले बताए।
उनका अनुसार विद्युत् अवरोध भए पनि हालसम्म अस्पतालको उपलब्ध स्रोत–साधनबाट घाइतेको उपचार तथा आवश्यक शल्यक्रिया गर्न समस्या परेको छैन। त्रिशूली अस्पतालको एकपटकमा करिब ५० जनासम्म घाइतेलाई उपचार सेवा दिन सक्ने क्षमता रहेको उनले बताए।
‘अहिलेसम्म अस्पतालको स्रोत–साधनले सेवा प्रवाह गर्न भ्याइरहेको छ,’ डा. लामाले भने, ‘तर घाइतेको संख्या बढ्दै जाँदा संघ र प्रदेश सरकारसँग आवश्यक सहयोगका लागि समन्वय गरिरहेका छौँ।’
उद्धार कार्य अघि बढ्दै जाँदा घाइतेको संख्या अझै बढ्न सक्ने अस्पतालको अनुमान छ। ५०–६० जनाभन्दा बढी घाइते आउन सक्ने सम्भावनालाई ध्यानमा राखेर संघ तथा प्रदेश सरकारसँग समन्वय भइरहेको डा. लामाले बताए।
यता बट्टार, विदुरलगायतका क्षेत्रमा संघीय अस्पतालबाट मेडिकल टिमसहितका टोली परिचालन भइसकेका छन्। तर प्रभावित क्षेत्रमा सडक अवरोध रहेकाले घाइतेलाई अस्पतालसम्म ल्याउन कठिनाइ भइरहेको छ।
‘उद्धारको क्रम जारी छ,’ डा. लामाले भने, ‘अझै कति घाइते अस्पताल आइपुग्छन् भन्ने अहिले नै भन्न सकिने अवस्था छैन।’
