काठमाडौं– बलिउड अभिनेता अमिताभ बच्चनको स्वास्थ्यलाई लिएर पुनः चिन्ता व्यक्त हुन थालेको छ। उनले सञ्चालन गर्दै आएको चर्चित टेलिभिजन कार्यक्रम ‘कौन बनेगा करोडपति’ (केबीसी) को नयाँ भागको छायाङ्कन एक सातादेखि रोकिएको खबर सार्वजनिक भएको छ।
भारतीय सञ्चारमाध्यम एबीपी न्युजका अनुसार अमिताभको स्वास्थ्यमा समस्या देखिएपछि कार्यक्रम निर्माताले नयाँ भागको छायाङ्कन रोकेका हुन्। कार्यक्रमसँग सम्बन्धित एक स्रोतलाई उद्धृत गर्दै सार्वजनिक गरिएको समाचारमा उनको स्वास्थ्यमा सुधार आए आगामी सातादेखि छायाङ्कन पुनः सुरु हुन सक्ने उल्लेख छ।
छायाङ्कन रोक्नुअघि अभिनेता रणवीर कपुर, साई पल्लवी र रवि दुबे सहभागी भएको विशेष भाग छायाङ्कन गरिएको थियो। उनीहरू आगामी चलचित्र ‘रामायण’ को प्रचारका लागि कार्यक्रममा पुगेका थिए। उक्त भाग सुरुमा चलचित्र प्रदर्शनको आसपास प्रसारण गर्ने योजना थियो। तर पछि त्यसलाई दीपावली विशेष कार्यक्रमका रूपमा प्रसारण गरिएको थियो।
यसैबीच अमिताभले शनिबार आफ्नो ब्लगमा बिस्तारै पुरानै दिनचर्या र काममा फर्किरहेको उल्लेख गरेका छन्। केही समय दैनिक जीवन र कामबाट टाढा भएपछि पुनः पुरानै लयमा फर्किन सहज नहुने उनको भनाइ छ।
उनले दैनिक जीवनमा कहिलेकाहीँ चस्मा, मोबाइल र केही घण्टाअघि गरेका कामसमेत बिर्सने गरेको बताएका छन्। तर विद्यालयको आठौँ कक्षाका पुराना सम्झनाहरू भने अझै ताजा रहेको उल्लेख गरेका छन्।
यद्यपि, केबीसीको छायाङ्कन रोकिनुको कारणबारे अर्को फरक विवरण पनि सार्वजनिक भएको छ। द इन्डियन एक्सप्रेस को ७ नोभेम्बर २०२६ को रिपोर्टअनुसार कार्यक्रमसँग सम्बन्धित अर्को स्रोतले अमिताभको स्वास्थ्य नभई उनको समय व्यवस्थापन र छायाङ्कनका लागि मिति उपलब्ध नहुनुलाई ब्रेकको कारण बताएको छ।
उक्त रिपोर्टमा अमिताभ नोभेम्बर ११ पछि छायाङ्कनका लागि उपलब्ध हुन सक्ने उल्लेख छ। यस्तै, सोनीलिभले केबीसीका नयाँ भाग नोभेम्बर १६ देखि प्रसारण हुने जानकारी दिएको छ।
यसरी छायाङ्कन रोकिएको विषयमा फरक–फरक विवरण सार्वजनिक भए पनि अमिताभले आफ्नो ब्लगमार्फत काममा क्रमशः फर्किरहेको संकेत गरेका छन्।
