काठमाडौं - सरकारले थप आठ वटा अस्पतालहरुमा एकद्वार संकट व्यवस्थापन केन्द्र सञ्चालन गर्ने भएको छ। स्वास्थ्य तथा जनसंख्या मन्त्रालयले एकद्वार संकट व्यवस्थापन केन्द्र संचालन मागर्दशन परिमार्जन गर्दै थप आठ वटा अस्पतालहरुमा उक्त केन्द्र सञ्चालन गर्न लागेको हो।
लैङ्गिक हिंसा पीडितलाई स्वास्थ्य उपचारका साथै अन्य आवश्यक सेवाहरु एकद्वारबाट उपलब्ध गराई लैङ्गिक हिंसा नियन्त्रण गर्ने सरकारको उद्देश्य छ। यसअघि ८० वटा अस्पतालहरुमा यो केन्द्र स्थापना भइसकेको छ। केन्द्र विस्तार भएसँगै यसको संख्या ८८ वटा पुगेको छ।
सरकारले बागमती प्रदेशमा तीन, लुम्बिनी प्रदेशमा तीन र सूदुरपश्चिम प्रदेशको दुई वटा अस्पतालमा उक्त केन्द्र विस्तार गरेको हो।
बागमती प्रदेशको राष्ट्रिय ट्रमा सेन्टर, शुक्रराज ट्रपिकल तथा सरुवा रोग अस्पताल र त्रिवि शिक्षण अस्तपाल, लुम्बिनी प्रदेशको रामपुर अस्पताल, तुलसीपुर अस्पताल र भिम अस्पताल, सूदुरपश्चिम प्रदेशको टिकापुर र गोकुलेश्वर अस्पतालमा केन्द्र विस्तार गरिएको हो।
उक्त केन्द्रले एकीकृत रुपमा महिला विरुद्धका हिंसालाई सम्बोधन गर्ने, हिंसा पीडित बालिका, किशोरी र महिलाका साथमा रहेका बालबच्चा समेतलाई उपचार तथा आश्रयको व्यवस्था मिलाउने मार्गदर्शनमा उल्लेख छ।
सबै किसिमका लैङ्गिक हिंसाबाट प्रभावित व्यक्ति यसको लक्षित समूह हुन्। सशस्त्र द्धन्द्ध तथा प्राकृति विपद तथा महामारीका कारण हिंसामा परेका र पर्नसक्ने महिला वा बालबालिका, एचआइभी तथा संक्रमित भई लैङ्गिक हिंसाबाट प्रभावित र तेस्रो लिंगी समूहका व्यक्तिहरुलाई पनि यसले समेटेको छ।
केन्द्र स्थापना भएको अस्पतालबाट लैङ्गिक हिंसा पीडित वा प्रभावित व्यक्तिलाई २४ सै घण्टा नि:शुल्क रुपमा सेवा उपलब्ध गराउनुपर्नेछ। मार्गदर्शनले लैङ्गिक हिंसा पीडितलाई अस्पतालसम्म सार्वजनिक यातायात सेवाबाट आवत जावत गर्न तथा आवश्यकता अनुसार एम्बुलेन्स सेवाका लागि खर्च उपलब्ध गराउने व्यवस्था पनि गरेको छ।
पीडितलाई अन्य अस्पतालमा उपचारका लागि रेफर गर्नुपर्ने भए मामला व्यवस्थापन समितिको निर्णय अनुसार उपचार, यातायात, एवं खाना खर्च, पीडितको साथमा बालबालिका भएमा उनीहरुका लागि उपचार, यातायात तथा खाना खर्च समेत बेहोनुपर्नेछ। पीडितको साथमा अभिभावक/सहयोगी समेत जानुपर्ने अवस्थामा एक जनाको यातायात तथा खाना खर्च समेत बेहोनुपर्ने व्यवस्था छ।
यी हुन् ८८ अस्पताल
