काठमाडौं- विदेश जाने, खासगरी वैदेशिक रोजगारीमा जाने नेपालीले कोरोनाविरुद्धको खोप लगाएको प्रमाणपत्र लिन ठूलो सास्ती ब्यहोर्नुपरेको छ। खोप कार्ड प्रमाणीकरणका लागि शुक्रराज ट्रपिकल तथा सरुवा रोग अस्पताल पुगेकाहरुले दिनहुँ यस्तो सास्ती भोगिरहेका छन्। भीडभाड उस्तै बढेको छ, सेवाग्राहीको गुनासो उस्तै छ।
खोप कार्ड प्रमाणीकरण कार्य किन यस्तो भद्रगोल बन्यो त? शुक्रराज ट्रपिकल तथा सरुवा रोग अस्पतालका निर्देशक डा. अनुप बाँस्तोला प्रमाणीकरणका लागि टेकु अस्पतालमा मात्र भीड लाग्दा यस्तो समस्या देखिएको बताउँछन्। उनले सेवाग्राहीको चाप अस्पतालले धान्न नसक्नेगरी बढ्दा पनि समस्या देखिएको बताए।
टेकु अस्पतालले पहिले पनि प्रमाणीकरणको काम गर्दै आएको र अहिले पनि सेवाग्राहीमा यहीँ मात्र सेवा पाइन्छ भन्ने परेकाले भीड बढेको र त्यसले समस्या निम्त्याएको डा. बाँस्तोलाले उल्लेख गरे। देशभरका ५० बेडभन्दा माथि क्षमता भएका अस्पतालहरुलाई यो सेवा दिनेगरी विकास नगर्दासम्म समस्या समाधान नहुने उनको भनाइ छ। देशभर यस्ता सेन्टर भएकाले तिनलाई व्यवस्थित गर्न सरकारले सर्कुलर गरेको तर, भएभरका मानिसहरु टेकु अस्पतालमै थुप्रिँदा समस्या भएको उल्लेख गर्दै उनले भने, 'यो समस्याको समाधान भनेको तत्काल प्रमाणीकरणको कार्यलाई डिजिटल बनाउने र ५० बेडभन्दा माथिका अस्पतालहरुलाई जिम्मा दिने नै हो।'
खोप प्रमाणीकरणमा देखिएका समस्या र समाधानका उपाय डा. बाँस्तोलाकै शब्दमाः
विदेश जानेलाई भिसाका लागि समस्या भएपछि उहाँहरु कोभिड खोप कार्ड प्रमाणीकरणका लागि अस्पताल आउनु स्वाभाविक हो। सबैको पायक पर्ने, जानेबुझेको केन्द्र पनि भएकाले टेकु अस्पतालमा भीड बढेको हो जस्तो लाग्छ। यही कारण हामीले डट्सको औषधि बाँड्ने ठाउँमा पनि केन्द्र बनाएर काम गरेका छौं। करिब ५०० मानिसको हरेक दिन प्रमाणीकरण गरेका छौं।
अहिले हामी खोप लगाउने कि, कोरोना संक्रमितको उपचार गर्ने कि, खोप प्रमाणीकरण गर्ने भन्ने अन्योलमा परेका छौं। सरकार र स्वास्थ्य मन्त्रालयले अरुतिर परिपत्र गरे पनि सबै सेवाग्राहीको चाप भने यहीँ मात्र छ। हरेक दिन ३०० जनाको टोकन बाँड्ने काम गरे पनि त्यसले नभ्याउँदा अरु १०० भन्दा बढीको पनि गर्ने गरेका छौं। यसलाई अब छिट्टै डिजिटल बनाउने काम सुरु भएको छ। यो चल्न थालेपछि अलि समस्या कम होला।
समस्या कस्तो छ भने यता कोरोनाका बिरामी बढेका हुन्छन्, उता भेरिफिकेसनको चाप बढेको छ। कसैलाई पनि फर्काउन मन लाग्दैन, तर सक्दै नसक्ने भएपछि के गर्नु? सुरुका दिनमा हामीले एक हजार जनासम्मको गरेका थियौं। अहिले कोरोना संक्रमण बढेर बिरामीको चाप बढेपछि दैनिक ५०० जनासम्मको गरेका छौं।
यसको सहज उपाय भनेकै ५० बेडभन्दा माथिका अस्पतालमा प्रमाणीकरण हुन्छ भन्ने जानकारी सबैलाई दिनुपर्यो। अनि त्यस्ता अस्पतालले पनि यो काम गरिदिनुपर्यो। भेरिफिकेसन नभएसम्म विदेश जाने टिकट नपाउने समस्या भएकाले उहाँहरुलाई फर्काउन हुँदैन। मुख्य कुरा देशभरका अस्पतालहरुले सेवा सुरु गर्ने हो भने यो भीड बाँडिनेछ। अनि काम पनि सहज हुनेछ।
