काठमाडौं - एमबीबीएस तथा बीडीएस अध्ययनमा लिएको अतिरिक्त शुल्क फिर्ताको मागसहित नेपाल मेडिकल कलेज (एनएमसी)का इन्टर्न चिकित्सक आन्दोलित भएका छन्। अतिरिक्त शुल्क फिर्ताको मागसहित उनीहरु विगत ८ दिनदेखि आन्दोलित भएका हुन्।
काठमाडौं विश्वविद्यालय (केयु) अन्तर्गत ०७५/७६ मा एमबीबीएस अध्ययन गरेका इन्टर्न चिकित्सकहरु कलेजले लिएको अतिरिक्त शुल्क शिक्षा मन्त्रालयको निर्देशनपछि पनि फिर्ता नभएपछि आन्दोलित भएका हुन्।
उनीहरुका अनुसार एनएमसीले ६० जना विद्यार्थीबाट अतिरिक्त शुल्क लिएका छन्। कलेजले केयु दर्ता शीर्षकमा १५ हजार, काउन्सिल दर्ता ३ हजार, केयु परीक्षा शुल्क ४० हजार, आन्तरिक परीक्षा शुल्क १ लाख ५० हजार ,इन्टर्नसिप शुल्क २ लाख, कम्युनिटी पोस्टिङ तथा स्किल ल्याब १ लाख ८० हजार तथा सेक्युरिटी डिपोजिट १ लाख गरी जम्मा ६ लाख ८८ हजार अतिरिक्त शुल्क लिएको इन्टर्न चिकित्सकको दाबी छ।
चिकित्सा शिक्षा आयोगको नियम विपरीत तथा जारी गरेको प्रतिवेदन विपरीत कलेजले शुल्क लिएको तथा फिर्ता नभएको उनीहरु बताउँछन्।
चिकित्सा शिक्षा आयोगको उक्त प्रतिवेदनको ऐन २०७५ दफा २ को ६ बमोजिम शिक्षण संघ संस्थाहरुले शिक्षण अवधिभर लिने भर्ना, ल्याब, पुस्तकालय, समुदाय तालिम जस्ता विषयहरु शिक्षण शुल्क भएकोले विद्यार्थीहरुले अतिरिक्त शुल्क तिर्न नपर्ने उल्लेख भएपनि केमएमसीले उक्त नियम पालना नगरेको देखिन्छ।
‘विगत ८ दिनदेखी शान्तिपुर्ण रुपमा आन्दोलन गरिरहेका छौं। आज आठौं दिन ओपीडी सेवा नै ठप्प पार्न बाध्य भएका छौं’, एक चिकित्सकले भने। अतिरिक्त शुल्क फिर्ता गर्न प्रशासनलाई पटक पटक आग्रह गरेपनि नभएको आन्दोलित भएको ती चिकित्सकले बताए ।
अस्पताल निर्देशक डा साविया यासमिन भने आफूहरु समस्या सल्टाउनै लागिपरेको बताउँछिन्। उनले भनिन्, 'अघिल्लो व्यवस्थापनको बेलाको कुरा हो। त्यहीबेला मागेको भएपनि कुरा सल्टिहाल्थ्यो। अहिले केही प्राविधिक जटिलता छन्। त्यसलाई मिलाउने विषयमा विद्यार्थीहरुसँग कुरा भइरहेकव छ।'
केयु अन्तर्गतका अन्य मेडिकल कलेज दिएसरहको रकम फिर्ता गर्न आफूलाई समस्या नभएको समेत उनले बताइन्। उनले भनिन्, 'विद्यार्थीले दाबी गरेअनुसार दिन केही प्राविधिक समस्या छन्। सरकारलाई उक्त आयको कर तिरिएको छ। अदालतमा मुद्दा हालेर तिर्न आदेश पाइयो भने सहज हुन्थ्यो।'
विद्यार्थीसँग छलफल जारी रहेको बताउँदैैैैैैै समस्या सुल्झाउने उपायतिरै सक्रिय रहेको बताइन्। लगातार संवाद समेत जारी राखेको उनको भनाइ छ।
