काठमाडौं- कोरोना देखिएकी ६ वर्षीया बालिका नियमित रुपमा अस्पताल आइरहने विरामी भएको पाइएको छ। उनी आफ्ना हजुरबा र आमासँग वैशाख ३० गते काठमाडौं आएकी थिइन्।
बालिका नियमित चेकजाँचका लागि हजुरबा र आमासँग दूध बोक्ने ट्यांकरमा काठमाडौं आएकी थिइन्। उनीहरु गाउँकै सहकारीको लु १ क ३२३९ नम्बरको ट्यांकरमामा चढेर काठमाडौं आएका थिए।
कपिलवस्तु वाणगंगा ४ ठाकुरापुरकी ६ वर्षीया बालिकालाई श्वासनलीमा समस्या थियो। श्वासनलीमा मासु पलाएको र यसअघि चार पटकसम्म उनको मासु काटिएको थियो।
लकडाउन लामो जाने भएपछि हजुरबाले वडा नम्बर ४ को कार्यालयमा पुगेर बिरामी नातिनी काठमाडौं लैजान पास बनाएका थिए। वडा नम्बर ४ का वडाध्यक्ष गणेश क्षेत्रीले काठमाडौं लैजानका लागि पास बनाइदिएको बताए। टेलिफोनमा कुराकानी गर्दै उनले बिरामी र नियमित रुपमा जचाउँने भन्दै पास बनाएर एम्बुलेन्समा जान पनि सुझाब दिएको बताए।
सिफारिस बनाएपछि उनीहरुले गाउँकै सहकारीको ट्यांकरमा ससुरा बुहारी काठमाडौं हिडेका थिए।
काठमाडौं कलंकी पुगेपछि उनीहरु ट्यांकरबाट ओर्लेका थिए। ट्यांकर अन्यत्रै जाने भएकाले उनीहरु कलंकीमै ओर्लिए र अर्को गाडिको सहायतामा अस्पताल पुगेका थिए।
त्रिवि शिक्षण अस्पतालको नाक, कान, घाँटी विभागमा परीक्षण भर्ना भएकी ती बालिकाको अप्रेशन गर्ने तयारी थियो। त्यसअघि अस्पतालले कोरोना परीक्षणका लागि पिसिआर गर्ने निर्णय गरेको थियो।
परीक्षण गराउँदा बालिकामा संक्रमण पुष्टि भएपछि अस्पतालमा उनीसँग सम्पर्कमा आएको २५ जनाको स्वाब संकलन गरिएको छ। संक्रमण पुष्टि भएपछि उनीहरु तीनै जना अस्पतालमै छन्। बालिकालाई अस्पताल लगेका उनीहरु दुई जनाको पनि कोरोना भाइरस परीक्षण गर्ने तयारी भइरहेको छ।
दुई वडा सिल, परिवार र अन्यलाई होम क्वारेनटाइनमा
बालिकामा संक्रमण देखिएपछि वाणगंगा ४ ठाकुरापुर र गजेहडा क्षेत्र सिल गरिएको वडाध्यक्ष क्षेत्रीले बताए।
बालिकाको सम्पर्कमा आएका सबैलाई होम क्वारेन्टाइनमा राखिएको उनले बताए। दूध भर्ने र बालिकाको टोलबाट अन्यलाई खतरा देखिएकाले उनीहरुलाई घरमै क्वारेनटाइन बस्ने व्यवस्था मिलाइएको र अन्यलाई कोरोना परीक्षण लगायतका कार्य हुने उनले बताए । ‘सहकारीदेखि गाउँटोलका सबैलाई होम क्वारेन्टाइनमा बस्न भनिएको छ’, वडाध्यक्ष क्षेत्रीले भने ‘पालैपालो सबैको पिसिआर परीक्षण हुने छ, सुरुमा चालकको परीक्षण गर्ने तयारी भइरहेको छ।’
बालिकामा संक्रमण देखिएपछि ठाकुरापूर क्षेत्रमा त्रास फैलिएको छ। बालिकाका बाबु रोजगारीका लागि भारतमा छन् भने उनको घरमा बालिकासहित ६ जना रहेको उनले बताए।
‘काठमाडौं गएका दुईजनाको रिपोर्ट नआउन्जेलका लागि होम क्वारेन्टाइनमा बस्न भनिएको छ’, उनले भने ‘त्यसपछि घरपरिवारमा पनि परीक्षण गर्नु पर्छ कि पर्दैन भन्ने टुंगो लाग्छ।’
नगरपालिकाले परीक्षणका लागि प्रदेश र संघका तालुकदार कार्यालयमा जानकारी गराएको उनले बताए। बालिका र बालिकाका घरपरिवार घरबाट अन्यत्र गएको र असावधानी अपनाएको भन्ने कुनै विवरण नरहेकाले काठमाडौं जाने क्रममै संक्रमण भएको हुनसक्ने प्रारम्भिक अनुमान गरेको उनले बताए।
