बैतडी- कुनै बेला कोरोना भाइरस संक्रमणको उच्च जोखिममा रहेको सुदूरपश्चिम प्रदेशमा हाल संक्रमणदर ओरालो लाग्दै गएको छ। भारतसँग सीमा जोडिएको यस प्रदेशमा कोरोना भाइरस संक्रमितको सङ्ख्या न्यून रहेको छ।
यो हप्ताको शुक्रबार र आइतबार यस प्रदेशमा संक्रमितको सङ्ख्या शून्य झरेको स्वास्थ्य निर्देशनालयले जनाएको छ। अन्य दिनहरुमा पनि संक्रमितको सङ्ख्या पाँचभन्दा पनि कम रहेको छ। हप्ताको दोस्रो दिन सोमबार पाँच जनामा, मङ्गलबार र बुधबार एक÷एकजनामा, बिहीबार दुईजनामा संक्रमण पुष्टि भएको थियो।
भारतमा कोरोना भाइरसको नयाँ भेरियन्ट ओमिक्रोन तीव्र रुपमा फैलिएसँगै गत माघमा त्यसको प्रभाव यस प्रदेशमा पनि देखिएको थियो। त्यसपछि यहाँका झुलाघाट, पुलघाट, जौलजीवी, गड्डाचौकी र त्रिनगर नाकाबाट फर्किने अधिकांशमा कोरोना भाइरस संक्रमण देखिन थालेको थियो।
हाल भने संक्रमणदर निकै कम रहेको सुदूरपश्चिम प्रदेश स्वास्थ्य निर्देशनालयका कोभिड–१९ सम्पर्क व्यक्ति हेमराज जोशीले जानकारी दिए। हाल संक्रमणदर घटेको भए पनि जोखिम भने कायमै रहेको उनले बताए। अन्तरराष्ट्रिय स्वास्थ्य नियमावली २००५ अनुसार सीमानाकामा परीक्षण कार्य जारी राखिएको जनाइएको छ।
प्रदेशका तीन जिल्ला संक्रमणमुक्त
कोरोना भाइरस संक्रमणदर ओरालो लागेसँगै सुदूरपश्चिमका तीन जिल्लामा संक्रमण शून्य रहेका छन्। प्रदेशका नौ जिल्लामध्ये डोटी, अछाम र बाजुरामा हाल एकजना पनि कोरोना भाइरस संक्रमणका सक्रिय संक्रमित नरहेको निर्देशनालयको तथ्याङ्कमा उल्लेख छ।
प्रदेशका अन्य जिल्लामा गरी कूल ४० जना सक्रिय संक्रमित रहेका छन्। सबैभन्दा बढी कैलालीमा २५, कञ्चनपुरमा नौ, बैतडीमा तीन, दार्चुला, डडेल्धुरा र बझाङमा एक÷एकजना मात्रै सक्रिय संक्रमित रहेका छन्। सक्रिय संक्रमितमध्ये दुईजनाको सेती प्रादेशिक अस्पतालको आइसियु कक्षमा उपचार भइरहेको छ भने अरू सबै होम आइसोलेशन छन्।
सुदूरपश्चिमममा हालसम्म ५९ हजार ५९२ जनामा कोरोना भाइरस संक्रमण पुष्टि भएको छ। पाँच लाख २३ हजार ६९९ जनाको नमूना परीक्षण गर्दा उक्त सङ्ख्यामा कोरोना संक्रमण देखिएको हो। संक्रमणकै कारण यस प्रदेशमा हालसम्म ६३३ जनाको मृत्यु भइसकेको छ। रासस
