काठमाडौं- कर्मचारीको इच्छाविपरीत जन्मदिनको भोज आयोजना गरिदिएको भन्दै संयुक्त राज्य अमेरिकामा एक कम्पनीलाई जरीमाना तिर्न आदेश दिइएको छ। आफ्नो इच्छाविपरीत जन्मदिनको भोज आयोजना गरिदिएको भन्दै मुद्दा हाल्ने एक व्यक्तिलाई ४,५०,००० डलर तिर्न कम्पनीलाई आदेश दिइएको हो।
कन्टकीका ती व्यक्तिले जन्मदिन मनाउन आयोजना गरिने कार्यक्रमले आफूलाई उद्विग्न बनाउने र तनाव बढाउने भन्दै अरू कर्मचारीको जन्मदिनमा जस्तो आफ्नोमा उत्सव नमनाउन आग्रह गरेको दाबी गरेका छन्।
सन् २०१९ मा ग्र्याभिटी डायग्नोस्टिकमा आयोजना गरिएको भोजपछि आफूलाई पटकपटक अत्याहट भएको दाबी केभिन बर्लिङले गरेका छन्।
बर्लिङले मुद्दामा अपाङ्गताका कारण आफूलाई भेदभाव गरिएको आरोप लगाएका थिए।
तर रोजगारदाता कम्पनीले आफूले त्यस्तो कुनै अपराध नगरेको बताएको थियो।
कन्टकीको केन्टन काउन्टीमा हालिएको मुद्दामा बर्लिङले आफ्ना प्रबन्धकलाई जन्मोत्सव मनाउने समारोहले आफूलाई अत्याहट हुने तथा बाल्यकालको नमिठो सम्झना आउने भएकाले त्यसो नगरिदिन अनुरोध गरेको दाबी गरेका थिए।
तर उक्त कम्पनीले अगस्ट २०१९ मा बिना जानकारी उनको जन्मदिनको भोज आयोजना गरिदियो। तत्कालै उक्त कार्यक्रमबाट बाहिर निस्किएर उनले आफ्नो गाडीमा दिउँसोको खाजा खाए।
त्यसको भोलिपल्ट एउटा बैठकमा उनको आलोचना गरिएको तथा आफ्ना 'सहकर्मीको खुसी'प्रति बेवास्ता गरेको तथा 'सानी केटीजस्तो' भएको आरोप लगाइएको मुद्दामा उल्लेख छ।
तनावपूर्ण बैठकपछि उनलाई दोस्रो पटक अत्याहट भयो। त्यसपछि उनलाई घर फिर्ता पठाइयो।
त्यसको केही दिनपछि कोभिड-१९ परीक्षण गर्ने ग्र्याभिटी डायग्नोस्टिकले उनलाई कार्यस्थलको सुरक्षाको कारण देखाउँदै जागिरबाट हटायो। मुद्दामा उनले कम्पनीले आफूलाई अपांगता कारण भेदभाव गरेको र अनुरोध मानियोस् भन्दा अन्यायपरक रूपमा कारबाही गरेको दाबी गरेका थिए।
यो वर्ष मार्चको अन्त्यतिर दुई दिनको सुनुवाइपछि जुरीले उनलाई ४,५०,००० डलर तिर्न कम्पनीलाई आदेश दिएको छ।
त्यसमध्ये १,५०,००० डलर तलबबापत र बाँकी ३,००,००० डलर भावनात्वक पीडाका लागि भएको जनाइएको छ। बीबीसीको सहयोगमा
