काठमाडौं- दाङको बंगलाचुली गाउँपालिका उपाध्यक्षमा स्वास्थ्यकर्मी भक्तबहादुर जिसी निर्वाचित भएका छन्। जिसी नेपाली कांग्रेसका उम्मेदवार हुन्। उनले ५ हजार ९४५ मत ल्याएका छन्।
उपाध्यक्षमा निर्वाचित जिसीले नेकपा एमालेकी सरस्वताकुमारी घर्तीलाई भारी मत अन्तरले पराजित गरेका हुन्। घर्तीको ३ हजार २६५ मत आएको छ।
उपाध्यक्ष निर्वाचित जिसी सोही गाउँपालिकामा स्वास्थ्य संयोजकका रुपमा कार्यरत थिए। उनी नेपाल स्वास्थ्यकर्मी संघ दाङका सदस्य समेत हुन्।
गाउँपालिकाको अध्यक्षमा नेपाल कम्युनिष्ट पार्टी माओवादी केन्द्रका तुल्सीराम पुन मगर निर्वाचित भएका छन्।
यसैगरी, जुम्लाको कनकासुन्दरी गाउँपालिकाको अध्यक्षमा स्वास्थ्यकर्मी दामोदरप्रसाद आचार्य निर्वाचित भएका छन् भने सुनसरीकी ३५ वर्षीया स्वास्थ्यकर्मी पुनम चौधरी दुहवी नगरपालिका वडा नं १ मा सदस्य निर्वाचित भएकी छिन्।
