काठमाडौं- दुई स्वास्थ्यकर्मी पाल्पाको माथागढी गाउँपालिका अध्यक्ष र उपाध्यक्षमा चयन भएका छन्। राष्ट्रिय स्वास्थ्यकर्मी महासंघ नेपालका केन्द्रिय कमिटी सदस्य यम बहादुर चिदी माथागढी गाउँपालिकाको अध्यक्ष र महासंघकै सदस्य बिष्णुमाया लुङ्चे मगर उपाध्यक्षमा चयन भएका हुन्।
अध्यक्षमा नेकपा एमालेका यमबहादुर चिदी ६ हजार १०९ मत प्राप्त गरेर विजयी भए। उनका प्रतिस्पर्धी नेपाली कांग्रेसका सन्तोषकुमार थापाले ५ हजार ५५४ मत प्राप्त गरे।
त्यस्तै, उपाध्यक्षमा नेकपा एमालेकै विष्णुमाया लुङचे निर्वाचित भएकी छन्। उनले ५ हजार ८८२ मत प्राप्त गरिन्। उनकी प्रतिस्पर्धी नेपाली कांग्रेसकी विजयाकुमारी भट्टराईले ५ हजार ६४४ मत प्राप्त गरिन्।
स्वास्थ्यकर्मी चिदी राजीनामा दिनुअघि जिल्लास्थित स्वास्थ्य बीमा बोर्ड प्रमुखको रुपमा कार्यरत थिए। लुङ्चे भने माथागढी गाउँपालिकाको गोठादी स्वास्थ्य चौकीमा अनमी पदमा कार्यरत थिइन्।
