काठमाडौं- नेपाल चिकित्सक संघले मिस नेपाल अर्थ डा सरिसा श्रेष्ठलाई सम्मान गरेको छ। संघको केन्द्रिय कार्यालय बागबजारमा शनिबार एक कार्यक्रम आयोजना गर्दै मिस नेपाल अर्थ डा श्रेष्ठलाई सम्मान गरेको हो।
डा श्रेष्ठलाई संघका अध्यक्ष डा लोचन कार्कीसहितका पदाधिकारी, पूर्व पदाधिकारी, डा चन्दा कार्की, जुनियर डाक्टर कमिटीका पदाधिकारी लगायतको सहभागिता रहेको थियो।
सम्मान कार्यक्रममा संघका अध्यक्ष डा लोचन कार्कीले चिकित्सकहरु पेशागत रुपमा मात्र नभई अन्य विभिन्न क्षेत्रमा पनि सक्रिय हुँदै चिकित्सकहरुको नाम उचो बनाइरहेकोमा खुसी व्यक्त गरे। उनले मिस नेपाल अर्थ डा श्रेष्ठलाई मिस अर्थको उपाधि जित्न सुभकामना पनि दिए।
संघका उपाध्यक्ष डा अनिल कार्कीले नयाँ पुस्ताका चिकित्सकहरुमा चिकित्सकिय दक्षतासँगै अन्य विविध विषयमा पनि दक्ष हुनु गर्वको विषय भएको बताए।
मिस नेपाल अर्थ डा श्रेष्ठले फिलिपिन्समा हुने मिस अर्थ कार्यक्रममा वातावरण र स्वास्थ्यका विषयमा विभिन्न सन्देश लिएर जाने जानकारी दिइन्।
डा श्रेष्ठले किष्ट मेडिकल कलेजबाट एमबीबीएस अध्ययन गरेकी हुन्। उनी यसअघि मिस नेवा ११३८ को फस्ट रनरअप भएकी थिइन्। यसका साथै लिडरसिप क्याम्पेन सम्बन्धित मिस रोट्रयाक्ट २०१९ मा पनि सफल भएकी थिइन्।
