काठमाडौं - नेपाल फार्मेसी संघले औषधि व्यवसायीहरुको आन्दोलनमा कुनै पनि संलग्नता नरहेको जनाएको छ। संघले प्रेस विज्ञप्ति जारी गरी आन्दोलनमा रहेका औषधि व्यवसायीहरुको विरोध कार्यक्रममा कुनै पनि संलग्नता नरहेको जनाएको हो।
औषधि व्यवसायीहरुले आज पनि विरोध स्वरुप धर्नासँगै एक घण्टा फार्मेसी पसल बन्द गर्ने निर्णय गरेको छ। तर फार्मेसी संघले भने आफ्ना सदस्यहरुलाई नियमित रुपमा फार्मेसी सेवा प्रवाह गर्न आग्रह गरेको छ। फार्मेसी सेवा नागरिकको जीवन रक्षासँग जोडिएको अतिसंवेदनशील क्षेत्र भएको भन्दै संघले आफ्ना सेवा प्रवाह गर्न आग्रह गरेको हो।
विज्ञप्तिमा भनिएको छ, ‘नेपाल फार्मेसी संघले हाम्रा सम्पूर्ण सदस्यहरुलाई नियमित रुपमा फार्मेसी सेवा प्रवाह गर्न आग्रह गर्दछ। साथै नेपाल फार्मेसी संघ कुनै पनि प्रकारको आन्दोलन, बन्द हड्तालमा संलग्नता नरहेको कुरा अवगत गराउन चाहन्छौ।’
संघले औषधि ऐन २०३५ को दफा ११ मा गरिएको संशोधनले ल्याएका व्यवस्थालाई समेत समर्थन गरेको छ। आफ्नो फर्म तथा व्यवसाय समयमै नवीकरण गरी चर्को जरिवाना, अनावश्यक झन्झट तथा खारेजी जस्ता जोखिमबाट बच्न पनि संघले सबै सदस्यहरुलाई आग्रह गरेको छ।
पर्याप्त समय उपलब्ध हुँदा पनि नवीकरण नगरी संचालन गर्ने व्यवसायलाई कानुन अनुसार दर्ता खारेजी गर्ने अधिकार सरकारसँग रहेको विज्ञप्तिमा उल्लेख गरिएको छ।
‘औषधि तथा स्वास्थ्य सेवा सम्बन्धी कुनै पनि पेशामा प्रवेश गर्ने आधार केवल कानुनले तोकेको शैक्षिक योग्यता मात्र हो। प्रचलित कानुनले तोकेको शैक्षिक योग्यता नभईकन व्यवसाय गर्नु गैरकानुनी हो। यस्ता गतिविधिहरुलाई कानुन अनुसार नियमन गर्न सम्बन्धित निकायको ध्यानाकर्षण गर्दछौँ।’, विज्ञप्तिमा भनिएको छ।
