काठमाडौं - काठमाडौं विश्वविद्यालय (केयू) का एमडी/एमएसका विद्यार्थीहरुले नेपाल मेडिकल काउन्सिलको विशेष परीक्षामा भाग लिन पाउनुपर्ने माग गरेका छन्।
काउन्सिलले यही मंसिर १६ र १७ गते सञ्चालन गर्न लागेको विशेष परीक्षामा भाग लिन पाउनुपर्ने भन्दै केयूका विद्यार्थीहरुले माग गरेका हुन्। केयूको नियमित परीक्षाहरु वैशाखमा सकिएपनि ७ महिना ढिला गरी पूरक परीक्षा कार्तिक मात्र सञ्चालन भएको थियो।
केयूले परीक्षा ढिलो सञ्चालन गर्दा आफुहरु काउन्सिलको विशेष परीक्षामा भाग लिन नपाउने अवस्था आएको विद्यार्थीहरुले बताएका छन्। पूरक परीक्षा मंसिर ८ गते सकिएकाले ४ गतेसम्म फारम भर्ने मौका समेत छुटेको उनीहरुको भनाई छ।
विशेषज्ञ भएर पनि नेपामा काम गर्न नपाउने र आफुहरुको मेहनत खेर जाने भन्दै उनीहरुले विशेष परीक्षामा भाग लिने वातावरण मिलाइदिन काउन्सिलसँग माग गरेका छन्। हाल केयूमा ४० जना विद्यार्थी एमडी/एमएस अध्ययनरत छन्।
