काठमाडौं - चितवनको माडीस्थित बघौडा अस्पतालका चिकित्सक तथा स्वास्थ्यकर्मी माथि आक्रमण गर्ने चार जना पक्राउ परेका छन्।
बिहीबार राति चार/पाँच जनाको समूहमा आएका युवाहरुले चिकित्सक र स्वास्थ्यकर्मी माथि आक्रमण तथा दुर्व्यवहार गरेका थिए।इलाका प्रहरी कार्यालय माडीका प्रहरी निरीक्षक किरण राईले अस्पतालले शुक्रबार निवेदन दिएपछि चार जना आरोपीलाई पक्राउ गरिएको जानकारी दिए।
पक्राउ पर्नेमा माडीका किरण खाती, सङ्गम तिवारी, विकास गुरुङ र प्रकाश गौतम रहेका छन्। घटनाबारे थप अनुसन्धान भइरहेको प्रहरीले जनाएको छ।
बघौडा अस्पतालका निमित्त मेडिकल सुपरिटेन्डेन्ट डा धीरञ्जन कुमार साहका अनुसार बिहीबार राति सवा १० बजे अस्पताल परिसरभित्रै आक्रमण भएको हो। युवाले मादक पदार्थ सेवन गरी उनीहरु आक्रमण गरेको उनले बताए।
डा साहका अनुसार डा दीपेन्द्र विश्वास, डा देवेन्द विश्वास, हेअ अनुप सुवेदी, कविराज तिवारीलगायत चिकित्सक स्वास्थ्यकर्मी माथि घाउचोट हुने गरी कुटपिट भएको छ।
