काठमाडौं - अख्तियार दुरुपयोग अनुसन्धान आयोगले भ्रष्टाचार गरेको भन्दै कपिलवस्तुको मायादेवी गाउँपालिकाका सिअहेव महेन्द्र प्रसाद यादव सहित सात जना विरुद्ध मुद्दा दायर गरेको छ।
स्वास्थ्य सम्बन्धी कार्यक्रम सञ्चालन गर्दा आर्थिक अनियमिमता गरेको भन्दै अख्तियारले यादव सहित सात जना विरुद्ध मुद्दा दायर गरेको हो।
आर्थिक वर्ष २०७५/७६, ७७/७८ र ७८/७९ मा स्वास्थ्य सम्बन्धी विभिन्न कार्यक्रम सञ्चालन गर्न भनी लिएको पेश्की रकम तोकिएको काम गरी फर्छयौट गर्नुपर्नेमा लामो समयसम्म पनि आवश्यक कागजात बिल भरपाईहरु पेश नगरी सार्वजनिक सम्पत्ति हिनामिना गरेको अख्तियारले जनाएको छ।
यादव सहित गाउँपालिकाका तत्कालीन प्रमुख प्रशासकीय अधिकृतहरु रामचन्द्र ढकाल, प्रमेश्वर यादव, कृष्ण प्रसाद तिमिल्सिना, तत्कालीन लेखा अधिकृत प्रकाश गौतम, तत्कालीन लेखापाल तुल्सीराम पौडेल र लेखा गिरिराज गौतम विरुद्ध अख्तियारले मुद्दा दायर गरेको हो।
उनीहरु विरुद्ध भ्रष्टाचार निवारण ऐन २०५९ को दफा १७ बमोजिमको कसुरमा ४६ लाख ७ हजार ३ सय बिगो कायम गरिएको छ।
