काठमाडौं- चावहिलस्थित ॐ हस्पिटल एण्ड रिसर्च सेन्टर प्रा.लि. मा अर्थोपेडिक सर्जरीमा जटिलतम मानिने रिभर्स सोल्डर आर्थोप्लाष्टि नामक जटिल शल्यक्रिया सफलतापूर्वक सम्पन्न भएको छ।
झापा जिल्लाको भद्रपुर निवासी ८१ वर्षीया सावित्री श्रेष्ठलाई लडेर गम्भीर चोट लाग्दा कुमको हाड जटिल किसिमले भाँचिएको थियो। उक्त समस्याको उपचारका लागि वरिष्ठ हाडजोर्नी विशेषज्ञ तथा जोर्नी प्रत्यारोपण सर्जन प्रा.डा. नवीसमान सिंह प्रधानको नेतृत्वमा रहेको चिकित्सक टोलीले रिभर्स सोल्डर आर्थोप्लाष्टि विधिबाट शल्यक्रिया सफलतापूर्वक सम्पन्न गरेको हो।
शल्यक्रिया टोलीमा प्रा.डा. प्रधानसँगै अर्थोपेडिक सर्जनहरू डा. विदुर ज्ञवाली र डा. सुसन वैद्य संलग्न थिए। त्यसैगरी एनेस्थेसिया टोलीमा सिनियर कन्सल्ट्यान्ट एनेस्थेसियोलोजिस्ट प्रा.डा. श्याम महर्जन तथा डा. अस्मिता महर्जन सहभागी थिए।
हस्पिटलद्वारा जारी विज्ञप्ति अनुसार शल्यक्रिया सफल भएसँगै बिरामीको स्वास्थ्य अवस्थामा उल्लेखनीय सुधार देखिएको र आज अस्पतालवाट डिस्चार्ज भएकी छिन्। 'यस्तो जटिल तथा आधुनिक शल्यक्रिया नेपालमै सफलतापूर्वक सम्पन्न हुनु चिकित्सा क्षेत्रमा थप उपलब्धिका रूपमा हेरिएको छ,' विज्ञप्तिमा भनिएको छ।
ॐ हस्पिटलका अध्यक्ष तथा सिनियर कन्सल्ट्यान्ट रेडियोलोजिष्ट डा. आनन्द प्रसाद श्रेष्ठले अपचारमा संलग्न चिकित्सक टोलीसँगै बिजेता मानन्धर, मिनु श्रेष्ठ, मनिषा लामा, मञ्जु मेहता र लक्ष्मण श्रेष्ठ लगायतको नर्सिङ टिमलाई धन्यवाद सहित बधाई तथा शुभकामना व्यक्त गरे।
