काठमाडौं - एशियन फर्मास्युटिकल्सले छैटौँ एपोन फुटसल प्रतियोगिता २०८२ को उपाधि हात पारेको छ। नेपाल औषधि उत्पादक संघ (एपोन) मार्केटिङ सर्कलले आयोजना गरेको प्रतियोगितामा एशियन फर्मास्युटिकल्सले उपाधि हात पारेको हो। एशियनले क्वेस्ट फर्मास्युटिकल्सलाई ६/२ को गोल अन्तरले पराजित गरेको हो।
एशियनले यसअघिको पाचौँ प्रतियोगितामा जित हात पारेको थियो। काठमाडौंको चुनिखेलस्थित रोयल स्पोट्र्स पार्कमा शुक्रबारदेखि जारी प्रतियोगिताको फाइनल शनिबार भएको थियो।
एपोन मार्केटिङ सर्कलका संयोजक दिपेश प्रधानले नेपाल फर्मा एक्स्पो २०२६ को पहिलो कार्यक्रम अन्तर्गत फुटसल प्रतियोगिता राखिएको बताए। उनले खेलको पहिलो दिन शुक्रबार सुपर १६ र सुपर ८ को प्रतियोगिता सम्पन्न भएको र शनिबार सेमिफाइनल र फाइनल प्रतियोगिता भएको जानकारी दिए।
प्रतियोगितामा एशियन फर्मास्युटिकल्स प्रालि, क्वेस्ट फर्मास्युटिकल्स प्रालि, म्याग्नस फर्मा प्रालि, नेशनल हेल्थकेयर प्रालि, शिवम् फर्मास्युटिकल लिमिटेड, क्यूमेड फर्मुलेसन प्रालि, एसआर ड्रग ल्याबोरेटरीज प्रालि, फार्मोनिक्स लाइफ साइन्सेस प्रालि सहभागी थिए।
यस्तै पानस फर्मास्युटिकल्स प्रालि, ओम्निका ल्याबोरेटरीज प्रालि, देउराली–जनता फर्मास्युटिकल्स प्रालि, लोमस फर्मास्युटिकल्स प्रालि, क्यूबीडी फर्मास्युटिकल्स प्रालि, नेपाल फर्मास्युटिकल्स ल्याव (एनपीएल), डिभाइन हेल्थकेयर प्रालि र टाइम फर्मास्युटिकल्स प्रालि गरी १६ वटा टिम सहभागी थिए।
