काठमाडौं- राष्ट्रिय प्रजातन्त्र पार्टी (राप्रपा) ले आफ्नो चुनावी संकल्प पत्र मार्फत स्वास्थ्य क्षेत्रमा व्यापक सुधार र रूपान्तरण गर्ने महत्वाकांक्षी योजनाहरू अघि सारेको छ। पार्टीले आधारभूत स्वास्थ्य सेवालाई नागरिकको मौलिक अधिकारका रूपमा स्थापित गर्दै 'कोही पनि उपचार नपाएर मर्नु नपर्ने' अवस्थाको सिर्जना गर्ने संकल्प गरेको छ।
घरदैलोमै स्वास्थ्य सेवा र बीमामा कडाइ
राप्रपाले ज्येष्ठ तथा असक्त नागरिकहरूका लागि उनीहरूकै घरदैलोमा आधारभूत स्वास्थ्य सेवा पुर्याउने नीति लिएको छ। सबै नागरिकलाई स्वास्थ्य बीमाको पहुँचमा ल्याउने र बीमितले आफूले रोजेको अस्पतालमा उपचार पाउनुपर्ने व्यवस्था मिलाइने संकल्प पत्रमा उल्लेख छ। साथै, स्वास्थ्य बीमाको भुक्तानीमा देखिएका समस्याहरूलाई कडाइका साथ नियमन गरी व्यवस्थित गर्ने लक्ष्य राखिएको छ।
औषधिमा आत्मनिर्भरता र मूल्य नियन्त्रण
औषधिको मूल्यलाई सस्तो र सुलभ बनाउन प्रभावकारी मूल्य निर्धारण संयन्त्र बनाइने राप्रपाको योजना छ। निजी औषधि उद्योगहरूलाई सहुलियत प्रदान गरी औषधि उत्पादनमा मुलुकलाई क्रमशः आत्मनिर्भर बनाउने र सरकारी स्वामित्वको नेपाल औषधि उद्योग लिमिटेडलाई सुदृढ गरी अत्यावश्यक गुणस्तरीय औषधि उत्पादन गर्ने नीति पार्टीले लिएको छ।
सातै प्रदेशमा 'वीर अस्पताल' स्तरका अस्पताल
स्वास्थ्य पूर्वाधार तर्फ राप्रपाले काठमाडौँको वीर अस्पतालकै स्तरका सुविधायुक्त अस्पतालहरू सातै प्रदेशमा निर्माण गरी सञ्चालन गर्ने प्रतिबद्धता जनाएको छ। नेपाललाई उच्चस्तरीय स्वास्थ्य सेवा र गुणस्तरीय शिक्षाको क्षेत्रीय केन्द्र (हब) का रूपमा विकास गर्दै अन्तर्राष्ट्रिय स्तरका विद्यार्थी र बिरामीलाई आकर्षित गर्ने लक्ष्य राखिएको छ।
दीर्घरोगीलाई सहायता र वडा स्वास्थ्य प्रोफाइल
क्यान्सर, मृगौला तथा मेरुदण्ड रोग जस्ता गम्भीर स्वास्थ्य समस्या भएका नागरिकका लागि दिइने आर्थिक सहायतालाई अझ प्रभावकारी बनाइने संकल्प पत्रमा उल्लेख छ। निःशुल्क डायलाईसिस सेवालाई सर्वसुलभ बनाइनेछ। प्रविधिमैत्री स्वास्थ्य सेवाका लागि "वडा स्वास्थ्य केन्द्र" मार्फत प्रत्येक नागरिकको व्यक्तिगत 'स्वास्थ्य प्रोफाइल' तयार गरिने नवीन योजना समेत राप्रपाले अघि सारेको छ।
यसका साथै आयुर्वेद, प्राकृतिक योग र अन्य चिकित्सा पद्धतिको विकास, स्वास्थ्य क्षेत्रमा लगानी वृद्धि र औषधिको गुणस्तर नियन्त्रणलाई राप्रपाले आफ्नो चुनावी एजेन्डाको प्राथमिकतामा राखेको छ।
हेरौं राप्रपाको संकल्प पत्रमा स्वास्थ्यका विषयहरु
- आधारभूत स्वास्थ्य उपचार सेवा सबै नागरिकलाई निःशुल्क तथा अनिवार्य गरिनेछ। आम नागरिकले आधारभूत स्वास्थ्य सेवाबाट वञ्चित हुनुपर्ने र अस्पतालको मुख देख्नै नपाएर मर्नुपर्ने अवस्थाको अन्त्य गरिनेछ।
- ज्येष्ठ तथा असक्त नागरिकको घर दैलोमा आधारभूत स्वास्थ्य सेवा पुर्याइनेछ।
- सबै नागरिकलाई स्वास्थ्य बीमाको पहुँच वृद्धि गरी बीमाको दायरामा ल्याइनेछ र सबै बीमितले आफूले चाहेको अस्पतालमा उपचार गर्न पाउने व्यवस्था मिलाइनेछ। बीमितलाई गर्नु पर्ने स्वास्थ्य बीमाको भुक्तानीमा देखिएको समस्यालाई कडाईका साथ नियमन गरी व्यवस्थापन गरिनेछ।
- औषधीको मूल्य निर्धारण संयन्त्रलाई प्रभावकारी बनाई औषधीको मूल्य सस्तो तथा सुलभ बनाइनेछ।
- निजी औषधि उद्योगलाई आवश्यक सहुलियत प्रदान गरी औषधि उत्पादनमा मुलुकलाई क्रमशः आत्मनिर्भर बनाइनेछ।
- सरकारी स्वामित्वमा रहेको नेपाल औषधि उद्योग लिमिटेडलाई सुदृढ बनाई अत्यावश्यक गुणस्तरीय औषधि उत्पादन गरिनेछ।
- नेपाललाई उच्चस्तरीय स्वास्थ्य सेवा र गुणस्तरीय शिक्षा प्रदान गर्ने क्षेत्रीय केन्द्र (हब) का रूपमा रूपान्तरण गरिनेछ। आधुनिक अस्पताल, अनुसन्धान केन्द्र र उच्चस्तरीय स्वास्थ्य पूर्वाधार विस्तार गरी नागरिकलाई गुणस्तरीय उपचार उपलब्ध गराइनेछ, साथै अन्तर्राष्ट्रिय स्तरका विद्यार्थीलाई आकर्षित गर्ने गरी उत्कृष्ट अन्तर्राष्ट्रिय शैक्षिक संस्थाहरू/अस्पतालहरूको विकास गरिनेछ।
- क्यान्सर, मृगौला तथा मेरुदण्ड रोगबाट पीडित नागरिकलाई दिइने आर्थिक सहायताको व्यवस्थालाई अझ सुदृढ र प्रभावकारी बनाइनेछ। डायलाईसीस गर्ने निःशुल्क सेवालाई अझ प्रभावकारी र सर्वसुलभ रूपमा उपलब्ध गराइनेछ।
- स्वास्थ्य क्षेत्रमा लगानी वृद्धि गर्दै स्वास्थ्य सेवालाई दिगो र गुणस्तरीय बनाइनेछ।
- आयुर्वेद, प्राकृतिक योग तथा अन्य चिकित्सा पद्धतिको विकास र विस्तार गरिनेछ।
- सबै प्रकारको औषधिको गुणस्तर नियन्त्रणको लागि कडाईका साथ नियमन गरिनेछ।
- काठमाडौँको वीर अस्पताल स्तरको अस्पताल सातै प्रदेशमा निर्माण गरी सञ्चालन गरिनेछ।
- "वडा स्वास्थ्य केन्द्र" मार्फत वडाका प्रत्येक नागरिकको स्वास्थ्य प्रोफाईल तयार गरिनेछ।
