बागलुङ- बागलुङको ढोरपाटन क्षेत्रमा फैलिएको दादुरा संक्रमणलाई थप विस्तार हुन नदिन स्वास्थ्य कार्यालयले वृहत् खोप अभियान सुरु गर्ने भएको छ। ढोरपाटन नगरपालिकाका वडा नं. ७, ८ र ९ मा संक्रमण तीव्र देखिएपछि १० देखि १९ वर्ष उमेर समूहका ६ हजार ७ सय ६३ बालबालिका तथा किशोर-किशोरीलाई खोप लगाउने तयारी गरिएको हो।
स्वास्थ्य कार्यालय बागलुङका जनस्वास्थ्य प्रशासक प्रविण शर्माका अनुसार, यो विशेष खोप अभियान आगामी फागुन २९ गतेदेखि चैत १ गतेसम्म सञ्चालन हुनेछ। संक्रमणको जोखिममा रहेका किशोर-किशोरीका साथै उपचारमा प्रत्यक्ष संलग्न २ सय ३७ जना स्वास्थ्यकर्मीलाई समेत दादुरा विरुद्धको खोप प्रदान गरिनेछ।
७४ जनामा संक्रमणको शंका, ७ जना उपचाररत
ढोरपाटन क्षेत्रमा हालसम्म ७४ जनामा दादुराको शंकास्पद लक्षण देखिएको छ। तीमध्ये ३२ जना अस्पताल भर्ना भई उपचारपश्चात् घर फर्किसकेका छन् भने ७ जना बालबालिकाको अझै उपचार भइरहेको छ। फागुन ८ गते पहिलो पटक एक जनामा संक्रमण पुष्टि भएको थियो, जसलगत्तै अन्य ५ जनामा पनि प्रयोगशाला परीक्षणबाट दादुरा प्रमाणित भएको थियो।
संक्रमितहरूको उपचारका लागि ढोरपाटन–८ स्थित बोबाङ स्वास्थ्य चौकीमा छुट्टै आइसोलेसन वार्ड तयार गरिएको छ। यस्तै, बुर्तिबाङ अस्पतालमा ३० बेडको विशेष व्यवस्थासहित औषधि र आवश्यक सामग्री गण्डकी प्रदेश स्वास्थ्य मन्त्रालयले उपलब्ध गराएको छ।
जनशक्ति व्यवस्थापन र गाउँमै नमुना संकलन
खोप अभियानलाई प्रभावकारी बनाउन ढोरपाटनका सबै स्वास्थ्यकर्मी र महिला स्वास्थ्य स्वयंसेविका परिचालन गरिएको छ। जनशक्ति अपुग भएपछि छिमेकी बडिगाड र निसीखोला गाउँपालिकाबाट समेत स्वास्थ्यकर्मीहरू खटाइएको छ।
स्वास्थ्य टोलीले हाल गाउँ-गाउँमै पुगेर शंकास्पद बिरामीको नमुना संकलन र परीक्षण गरिरहेको छ। "हामीले संक्रमितको खोजतलास र उपचारलाई तीव्रता दिएका छौँ, खोप अभियानपछि संक्रमण पूर्ण नियन्त्रणमा आउने अपेक्षा छ," जनस्वास्थ्य प्रमुख शर्माले बताए।
सन् २०२६ सम्म दादुरा निवारण गर्ने लक्ष्य
नेपाल सरकारले सन् २०२६ सम्ममा दादुरा-रुबेलालाई 'जनस्वास्थ्य समस्या' का रूपमा नरहने गरी निवारण गर्ने लक्ष्य राखेको छ। ढोरपाटनको यो सक्रियतालाई सोही राष्ट्रिय अभियानको हिस्साका रूपमा हेरिएको छ। बागलुङमा यसअघि सन् २०२२ मा गलकोटमा र सन् २०२४ मा निसीखोलामा एक–एक जनामा दादुरा देखिएको थियो।
हावाबाट सर्ने र छिटो फैलिने प्रकृतिको यो रोगबाट बच्न खोप नै सबैभन्दा अचुक उपाय भएकाले १० देखि १९ वर्षका सबैलाई अभियानमा सहभागी हुन स्वास्थ्य कार्यालयले अनुरोध गरेको छ।
