विराटनगर- नोबेल मेडिकल कलेज शिक्षण अस्पतालमा छारेरोग (एपिलेप्सी) शल्यक्रियासम्बन्धी चौथो 'एनआइएनएस सिम्पोजियम' सफलतापूर्वक सम्पन्न भएको छ। 'एपिलेप्सी शल्यक्रियामा प्रगति'विषयक उक्त सिम्पोजियम २०८२ साल चैत २० र २१ गते (३–४ अप्रिल २०२६) आयोजना गरिएको हो।
न्युरोसाइन्स इन्स्टिच्युट अफ नोबेलको आयोजनामा सम्पन्न उक्त कार्यक्रम अन्नपूर्ण न्युरोलोजिकल इन्स्टिच्युट एन्ड एलाइड साइन्सेसको सहकार्यमा गरिएको थियो। सिम्पोजियमको कोर्स निर्देशकमा प्रा. डा. प्रकाश काफ्ले रहेका थिए भने प्रमुख अतिथिका रूपमा वरिष्ठ न्युरोसर्जन प्रा. डा. बसन्त पन्त सहभागी थिए।
कार्यक्रमको अवसरमा नोबेल र अन्नपूर्णबीच आपसी सहकार्य विस्तार गर्ने उद्देश्यले समझदारीपत्रमा हस्ताक्षर समेत गरिएको छ। उक्त समझदारीपत्रमा नोबेल मेडिकल कलेजका तर्फबाट डा. प्रकाश काफ्ले र अन्नपूर्ण न्युरोलोजिकल इन्स्टिच्युट एन्ड एलाइड साइन्सेसको तर्फबाट डा. बसन्त पन्तले हस्ताक्षर गरेका छन्।
सिम्पोजियममा एपिलेप्सी शल्यक्रियासम्बन्धी विभिन्न वैज्ञानिक प्रस्तुतीकरण, केस छलफल तथा क्लिनिकल मूल्याङ्कनका सत्रहरू सञ्चालन गरिएका थिए। साथै, 'टेम्पोरल लोबेक्टोमी' र 'कर्पस क्यालोसोटोमी' सम्बन्धी 'क्याडाभेरिक' (शवमा गरिने अभ्यास) कार्यशाला पनि सम्पन्न गरिएको आयोजकले जनाएको छ।
कार्यक्रममा देशभरका विशेषज्ञ चिकित्सक, चिकित्साशास्त्रका विद्यार्थी तथा स्वास्थ्यकर्मीहरूको उल्लेखनीय सहभागिता रहेको थियो। यस्ता कार्यक्रमले नेपालमा एपिलेप्सी उपचार तथा शल्यक्रियाको क्षेत्रमा ज्ञान आदानप्रदान र सीप अभिवृद्धिमा महत्त्वपूर्ण योगदान पुर्याउने विश्वास लिइएको छ।
