काठमाडौं- वीरगंजस्थित नेशनल मेडिकल कलेजले आवासीय चिकित्सकहरूमाथि कडा र अमर्यादित नियमहरू लादेको भन्दै नेपाल चिकित्सक संघले कडा आपत्ति जनाएको छ। संघले बुधबार एक प्रेस विज्ञप्ति जारी गर्दै कलेजको प्रशासनले गरिरहेको व्यवहार पेशागत मर्यादा विपरीत भएको बताएको हो।
संघका अनुसार कलेजले आवासीय चिकित्सकहरूलाई आवास, खाना र इन्टरनेटका लागि वार्षिक रूपमा मोटो रकम तिर्न अनिवार्य गरेको छ। त्यति मात्र नभई, चिकित्सकहरूलाई कलेजकै होस्टेलमा बस्न बाध्य पारिएको र भर्नाका समयमा उनीहरूको 'सक्कल प्रमाणपत्र' समेत प्रशासनले आफ्नो नियन्त्रणमा राखेको पाइएको छ।
'चिकित्सकहरूलाई दिनमा ४ पटकसम्म हाजिर गर्न बाध्य पारिएको गुनासो आएको छ,' संघका महासचिव डा. सन्जिब तिवारीद्वारा जारी विज्ञप्तिमा भनिएको छ, 'यस्ता कार्यहरूले चिकित्सकहरूको आत्मसम्मान र व्यक्तिगत स्वतन्त्रताको ठाडो हनन गरेको छ।'
पेशागत मर्यादा बाहिर गएर लागू गरिएका यस्ता बाध्यकारी व्यवस्थाहरू तत्काल फिर्ता लिन संघले कलेज प्रशासनसँग जोडदार माग गरेको छ। चिकित्सकहरूलाई स्वतन्त्र रूपमा काम गर्ने वातावरण मिलाउन र उनीहरूको व्यक्तिगत अधिकारको सम्मान गर्न पनि संघले सचेत गराएको छ।
हेरौं प्रेस विज्ञप्ति
वीरगंज स्थित नेशनल मेडिकल कलेजद्वारा आवासीय चिकित्सकहरूलाई आवास शुल्क अनिवार्य गरिएको प्रति नेपाल चिकित्सक संघको गम्भीर ध्यानाकर्षण भएको छ।
उक्त मेडिकल कलेजमा आवास, खाना, इन्टरनेट लगायतका लागि वार्षिक रूपमा अनिवार्य रकम तिर्न लगाइएको, अनिवार्य होस्टेल बस्न बाध्य पारिएको, भर्नाका क्रममा सक्कल प्रमाणपत्र नियन्त्रणमा राख्नुका साथै चिकित्सकहरूलाई दिनमा ४ पटक सम्म हाजिर गर्न बाध्य पारिएको भन्ने गुनासो आइरहेकोले उक्त कार्य पेशागत मर्यादा विपरीत रहेको संघको ठहर छ।
चिकित्सकहरूको आत्मसम्मान र व्यक्तिगत स्वतन्त्रता हनन हुने किसिमले मर्यादा विपरीत बाध्यकारी व्यवस्था लागू गरिएकोले उक्त निर्णय अविलम्ब फिर्ता लिन नेपाल चिकित्सक संघ कलेज प्रशासनसँग जोडदार माग गर्दछ।
डा. सन्जिब तिवारी
महासचिव
