काठमाडौं- नेपाल चिकित्सक संघ (एनएमए) को नयाँ नेतृत्वका लागि भएको निर्वाचनमा डा. बद्री रिजालले अध्यक्ष पदमा आफ्नो जित सुनिश्चित गरेका छन्। मतगणनाको अन्तिम परिणाम आउनु अगावै उनले निकटतम प्रतिस्पर्धीसँग गन्न बाँकी मतभन्दा बढीको अग्रता कायम गरेका हुन्।
कुल ७ हजार १०२ मत खसेकोमा हालसम्म ६ हजार ९१५ मत गणना भइसकेको छ। पछिल्लो मत परिणाम अनुसार डा. रिजालले ३ हजार १०५ मत प्राप्त गरेका छन् भने उनका निकटतम प्रतिस्पर्धी डा. मंगल रावलले २ हजार ८६७ मत पाएका छन्।
डा. रिजाल र डा. रावलबीचको मतान्तर २३८ रहेको छ। कुल खसेको ७ हजार १०२ मतमध्ये अब मात्र १८७ मत गन्न बाँकी छ।
डा. रिजालको अग्रता २३८ मत रहेको र गन्न बाँकी रहेको मत १८७ मात्र रहेकाले उनले औपचारिक घोषणा हुनु अगावै जित निकालेका हुन्।
अध्यक्ष पदको मत विवरण:
डा. बद्री रिजाल: ३,१०५ मत (४५.५१%)
डा. मंगल रावल: २,८६७ मत (४२.०३%)
डा. नारायण प्रसाद भुसाल: ८५० मत (१२.४६%)
