बाजुरा – बाजुरा अस्पतालका एमडीजीपी चिकित्सक डा. आशिष कार्कीले शल्यक्रिया मात्र होइन, स्वयं रक्तदान गरेर पनि एक बिरामीको ज्यान बचाएका छन्।
डा. कार्कीले त्रिवेणी नगरपालिका–९ की ३१ वर्षीया एक महिलालाई रक्तदान गरेर उपचारमा सहयोग गरेका हुन्।
जिल्ला अस्पतालमा अत्यधिक रक्तस्रावका कारण रगत आवश्यक परेकी ती महिलाको शल्यक्रिया गर्ने चिकित्सक डा. कार्कीले नै रक्तदान गरेका थिए। अस्पतालमा भर्ना भएकी महिलाका लागि आवश्यक रगतको व्यवस्था हुन सकेको थिएन। आफन्तलाई रगत खोज्न आग्रह गरिए पनि कतैबाट उपलब्ध नभएपछि डा. कार्की स्वयं रक्तदाता बनेका हुन्।
आकस्मिक अवस्थामा आवश्यक रगत उपलब्ध नहुँदा डा. कार्कीले गरेको रक्तदान स्वास्थ्यकर्मीको मानवीयता र सामाजिक दायित्वको उदाहरण बनेको अस्पतालका सूचना अधिकारी नृपराज गिरीले बताए।
डा. कार्की मात्र होइनन्, जिल्ला अस्पतालका अन्य चिकित्सक तथा स्वास्थ्यकर्मीले पनि आवश्यक पर्दा स्वयं रक्तदान गरेर बिरामीको ज्यान बचाउने गरेका छन्। जिल्ला अस्पताल बाजुरामा प्रायः रगतको अभाव हुने गरेको छ।
दुर्गम जिल्लामा नियमित रक्तसञ्चार सेवा र पर्याप्त रक्तदाता नहुँदा उपचारमा चुनौती थपिएको छ। जिल्लामा ब्लड बैंक नहुँदा रगतको आवश्यकता पर्दा सुरक्षाकर्मी तथा स्वास्थ्यकर्मीहरूको सहयोगमा भर पर्नुपर्ने बाध्यता रहेको छ।
यो घटना केवल एक चिकित्सकले रक्तदान गरेको सामान्य विषय मात्र होइन, दुर्गम क्षेत्रमा स्वास्थ्य सेवा सञ्चालनका क्रममा स्वास्थ्यकर्मीहरूले भोग्नुपर्ने वास्तविकताको प्रतिबिम्ब पनि हो। पर्याप्त स्रोत–साधन, विशेषज्ञ जनशक्ति र रक्तसञ्चार सेवाको अभावका बीच पनि स्वास्थ्यकर्मीहरू बिरामीको जीवनरक्षाका लागि अतिरिक्त जिम्मेवारी वहन गर्न बाध्य हुने अवस्था यस घटनाले देखाएको छ।
विशेषगरी बाजुरा जस्ता हिमाली जिल्लामा आकस्मिक रूपमा रगत आवश्यक पर्दा तत्काल व्यवस्थापन गर्न कठिन हुने गरेको छ। रक्तदाता खोज्ने, रगत परीक्षण गर्ने तथा आवश्यक रक्त समूहको रगत उपलब्ध गराउने प्रक्रिया चुनौतीपूर्ण बन्दै आएको छ। यस्ता परिस्थितिमा चिकित्सक स्वयं रक्तदाता बन्नु सेवा भावना र पेशागत समर्पणको उदाहरणका रूपमा हेरिएको छ।
दुर्गम क्षेत्रमा स्वास्थ्य सेवा केवल औषधि र उपकरणको भरमा मात्र चल्दैन। स्वास्थ्यकर्मीको प्रतिबद्धता, संवेदनशीलता र मानवीय व्यवहारले पनि त्यसको प्रभावकारिता निर्धारण गर्छ। सुत्केरी महिलाको ज्यान बचाउन डा. आशिष कार्कीले गरेको रक्तदानले स्वास्थ्य सेवाको यही मानवीय पक्षलाई पुनः एकपटक उजागर गरेको छ।
