काठमाडौं- संस्कृति, पर्यटन तथा नागरिक उड्डयनमन्त्री भानुभक्त ढकाललाई कोरोना संक्रमण भएको छ। उनीसँगै उनकी श्रीमती इन्दिरा फुयाँललाई पनि कोरोना संक्रमण भएको छ।
आइतबार गरिएको परीक्षणबाट आफूहरूमा कोरोना संक्रमण पुष्टि भएको मन्त्री ढकालले बताएका छन्।
‘आज गरिएको परीक्षणबाट हामी श्रीमान श्रीमतीलाई कोभिड-१९ संक्रमण भएको नतिजा प्राप्त भएको छ। हाल हाम्रो स्वास्थ्य अवस्था सामान्य रहेको छ र हामी निवासमा नै आराम गरिरहेका छौँ’, मन्त्री ढकालले सामाजिक सञ्जाल फेसबुकमा लेखेका छन्, ‘यस बीचमा हामीसँग सम्पर्कमा आउनुभएका महानुभावहरूलाई आवश्यक सावधानी र सजगता अपनाउनुहुन अनुरोध गर्दछौँ।’
ढकाल पूर्वस्वास्थ्य मन्त्री पनि हुन्। नेपालमा कोरोना प्रवेश गर्दा उनी स्वास्थ्यमन्त्री थिए। तर, पछि मन्त्रिपरिषद् हेरफेर हुँदा उनको जिम्मेवारी फेरिएको थियो।
