काठमाडौं- नेपाल टेलिकमले कोभिड-१९को रोकथाम, उपचार तथा नियन्त्रणमा खटिएका देशका सबै फ्रन्टलाइनर स्वास्थ्यकर्मीलाई निशुल्क फोन कल सुबिधा दिने भएको छ।
टेलिकमले डाक्टर, नर्स तथा अरु सबै स्वास्थ्यकर्मीलाई एक महिनाको लागि निशुल्क अनलिमिडेट भ्वाइस प्याक उपलव्ध गराउने भएको हो। ‘थ्याङ्क्यु हेल्थकेयर वर्कर’ नाम दिइएको यो सुविधा डाक्टर, नर्स, प्यारामेडिक्स, आयुर्वेदकर्मी, फार्मासिस्ट, ल्याब आदी सबैले पाउने बताइएको छ।
नेपाल टेलिकमको केन्द्रीय कार्यालयमा आज नेपाल मेडिकल काउन्सिल, नेपाल स्वास्थ्य व्यवसायी परिषद, नर्सिङ परिषद, फार्मेसी परिषद, आयुर्वेद चिकित्सा परिषद् लगायतका सबै स्वास्थ्यका नियमक निकायका प्रमुखहरुले सो सुविधा सम्बन्धी सम्झौतामा हस्ताक्षर गरेका छन्।
उक्त सुबिधा लिनका लागि सबै स्वास्थ्यकर्मीले सम्बन्धित परिषदले दिएको अनलाइन लिंकमा गएर फर्म भर्नुपर्ने हुन्छ। यसका साथै स्वास्थ्यकर्मकै नाममा दर्ता भएको नम्बरमा मात्र उक्त सुबिधा लिन पाइन्छ। यदी कोही स्वास्थ्यकर्मीसँग नम्बर छैन भने परिषदले उपलब्ध गराउने लिंकमा गएर नम्बरका लागि आवेदन समेत दिन सकिने बताइएको छ।
