काठमाडौं- एशिया तथा मध्य र दक्षिणी प्रशान्त महासागर क्षेत्रका चिकित्सकहरुको छाता संस्था कन्फेडेरेसन् अफ मेडिकल एसोसिएशन ईन एशिया एण्ड ओसियानिया (सीएमएएओ)को अध्यक्ष पदमा डा अनिलविक्रम कार्की निर्वाचित भएका छन्।
सीएमएएओको फिलिपिन्सको मनिलामा सम्पन्न ३८ औं साधारण सभा तथा ५९ औं परिषद् बैठकले डा कार्कीलाई अध्यक्ष पदमा निर्वाचित गरेको हो। डा कार्कीले सन् २०२५ देखि २०२६ सम्म सीएमएएओको नेतृत्व गर्नेछन्।
नेपाल चिकित्सक संघका अध्यक्ष डा कार्कीले नेपालका लागि यो ठूलो उपलब्धि र अवसर हो। उनले आफ्नो नेतृत्वसँगै सीएमएएओ ३९ औं वार्षिक साधारण सभा २०२५ मा नेपालमा हुने जानकारी दिए।
'अध्यक्ष पदमा निर्वाचित भएसँगै मैले यसलाई चुनौतीभन्दा पनि अवसरका रुपमा लिएको छु,' उनले भने, 'सन् २०२५ मा नेपालमा नै पहिलो पटक सीएमएएओको वार्षिक साधारण सभा हुने भएको छ।'
फिलिपिन्समा गत शनिबारदेखि सोमबारसम्म चलेको सम्मेलनमा नेपालका तर्फबाट डा कार्कीसहित चिकित्सक संघका महासचिव डा सञ्जिब तिवारीले कार्यपत्र समेत प्रस्तुत गरेका छन्।
सभाले चिकित्सकहरुका साझा सवालबारे १० बुँदे घोषणापत्र समेत जारी गरेको छ। सभाले स्वास्थ्य सेवाका क्षेत्रमा महिलाहरुको योगदानलाई कदर गर्ने, समावेशी र समतामूलक कार्यस्थलको प्रवर्द्धन गर्ने, महिलाहरुको नेतृत्वलाई सहयोग गर्ने, क्षमता अभिवृद्धि र मेन्टरसिप कार्यक्रमको विकास गर्ने, कार्यक्षेत्रमा हुने विभेदको अन्त्य गर्ने लगमयतबम विषय घोषणामा उल्लेख छ।
सीएमएएओमा नेपाल चिकित्सक संघसहित जापान, कोरिया, अस्ट्रेलिया, हङ्गकङ्ग, इन्डोनेसिया, मलेसिया, म्यानमार, फिलिपिन्स, सिङ्गापुर, ताइवान, थाइल्याण्ड, भारत, बंगलादेश, पाकिस्तान, श्रीलंका, कम्बोडिया, मकाउ लगायतका देशका मेडिकल एसोसिएशनहरु आवद्ध छन्।
