पोखरा- गण्डकी प्रदेशको स्वास्थ्य सचिवमा डा विश्ववन्धु बगालेले निरन्तरता पाएका छन्।
प्रदेश सरकारले सचिवबाट हटाएर तालिम केन्द्रमा सरुवा गरेपछि त्यसको विरोधमा उच्च अदालत पोखरामा गएका डा विनोदविन्दु शर्माको रिट खारेज भएसँगै बगालेले सचिवमा निरन्तरता पाउने भएका हुन्।
उच्च अदालत पोखराका न्यायाधीशद्वय दीपेन्द्र अधिकारी र उमेश कोइरालाको इजलासले शर्माको रिट खारेज गर्ने आदेश दिएको हो। शर्माले आफू सचिवमै कायम हुनुपर्ने माग सहित रिट दिएका थिए।
अदालतमा शर्माले सचिव भएर काम गरिसकेका व्यक्तिलाई घटुवा हुने गरी तालिम केन्द्रमा सरुवा गरेको आरोप समेत लगाएका थिए। शर्माको रिटमा पटक पटक छलफल र बहस भइसकेपछि सोमबार रिट नै खारेज भएको हो।
