अल्का अस्पतालको आईभीएफ सेन्टर पनि अवैध, मन्त्रालयले दिएको छैन स्वीकृति

मुख्य समाचार

आईभीएफ सेन्टरमाथि निगरानी श्रृंखला-३ अल्का अस्पतालको आईभीएफ सेन्टर पनि अवैध, मन्त्रालयले दिएको छैन स्वीकृति

ललितपुर– जवलाखेलस्थित अल्का अस्पतालले पनि स्वास्थ्य तथा जनसंख्या मन्त्रालयको स्वीकृति नै नलिई अवैध रुपमा टेस्टट्युब बेबी सेवा अर्थात इनभिट्रो फर्टिलाइजेसन (आईभीएफ) सेवा सञ्चालन गरिरहेको तथ्य फेल परेको छ। मध्यबानेश्वरस्थित भेनस अस्पतालले स्वीकृति नलिई आईभीएफ सेवा सञ्चालन गरिरहेको समाचार प्रकाशित भएको एक साता नबत्दै अल्का अस्पतालको आईभीएफ एन्ड फर्टिलिटी सेन्टर पनि अवैध रहेको तथ्य फेला परेको हो।

जनस्वास्थ्य सेवा नियमावली अनुसार स्वास्थ्य तथा जनसंख्या मन्त्रालयबाट अनिवार्य रुपमा इजाजत लिएर मात्र आईभीएफ सेवा सञ्चालन गर्न पाइन्छ। तर अल्का अस्पतालले भने मन्त्रालयबाट स्वीकृति नै नपाई धमाधम आईभीएफ सेवा भन्दै महँगो शुल्क लिइरहेको पाइएको छ। यस्तै सेवा भनेसले पनि अवैध रुपमा दिइरहेको स्वास्थ्यखबरले गत हप्ता समाचार प्रकाशित गरेको थियो।

स्वास्थ्य मन्त्रालयको गुणस्तर मापन तथा नियमन महाशाखाका अनुसार अल्का अस्पतालले २०७८ फागुन २९ गते स्वीकृतिका लागि मन्त्रालयमा निवेदन दिएको थियो। मन्त्रालयले गरेको अनुगमनका क्रममा मापदण्ड पूरा नभएपछि स्वीकृति भने पाएको छैन। अल्काको आईभीएफ सेवा अन्तर्गत जनशक्ति, ल्याब तथा अन्य पूर्वाधारको गुणस्तरका विषयमा समेत प्रश्न उठाउने प्रशस्त ठाउँ रहेको मन्त्रालयका कर्मचारी बताउँछन्। तर अल्काले मन्त्रालयलाई समेत अटेर गर्दै आईभीएफ सेवा सञ्चालन गरिरहेको छ।

जनस्वास्थ्य सेवा ऐन २०७५ र जनस्वास्थ्य सेवा नियमावली २०७७ अनुसार अनुमति नलिइ आईभीएफ सेवा सञ्चालन गर्नु गैरकानूनी मानिन्छ।

मन्त्रालयको गुणस्तर मापन तथा नियमन महाशाखा प्रमुख डा मदन उपाध्यायले कुनै पनि आईभीएफ सेन्टरले मन्त्रालयको स्वीकृति नलिई सेवा सुरु गर्न नहुने बताए। उनले त्यस्तो पाइएमा मन्त्रालयले कानुन अनुसार कारबाही गर्ने जानकारी दिए।

उनले आईभीएफ सेवा सञ्चालनका लागि इजाजत पूर्व गुणस्तर सुनिश्चित गरेर मात्रै सञ्चालन अनुमति दिइने बताए।