काठमाडौं- चिकित्सा शिक्षा आयोगको निर्देशक छनौटका लागि नाम सिफारिस गर्न गठित समितिविरुद्ध परेको रिट उच्च अदालत पाटनले खारेज गरेको छ। समितिलाई काम अगाडि नबढाउन माग गर्दै अदालतमा रिट परेको थियो।
आदालतले रिट खारेज गरेसँगै निर्देशक छनोटको काम अगाडि बढाउने बाटो खुलेको छ। उच्च अदालतका न्यायाधीश मुनेन्द्रप्रसाद अवस्थी र कृष्णराज कोइरालाको संयुक्त इजलासले आयोग तथा नाम सिफारिस गर्न गठित समितिलाई विपक्षी बनाई दायर रिट खारेज गरिदिएको हो।
आयोगमा चार जना निर्देशक रहन्छन्। निर्देशक नियुक्तिका लागि नाम सिफारिस गर्न गठित समितिले गत मंसिर ५ गते एक साताको अवधि तोकेर सूचना प्रकाशति गरेको थियो। उक्त सूचनापछि २० जनाले निर्देशकका लागि आवेदन दिएका थिए। ती मध्ये समितिले १२ जनालाई अल्पसूचीमा राख्दै नाम सार्वजनिक गरेको थियो।
उक्त अल्पसूचीमा असहमति जनाउँदै अदालतमा रिट परेको थियो। मंसिर २१ गते अदालतले प्रक्रिया अगाडि नबढाउन अन्तरिम आदेश दिएको थियो। त्यसपछि काम रोकिन पुगेको थियो।
आयोगमा मापदण्ड तथा प्रत्यायन निर्देशनालय, समन्वय तथा प्राज्ञिक उन्नयन निर्देशनालय, परीक्षा निर्देशनालय र नेसनल बोर्ड अफ मेडिकल स्पेसियालिटिजको निर्देशक पद रिक्त छन्।
