भक्तपुर– मध्यपुरथिमी नगरपालिका–२ सानोथिमीस्थित दिव्य ज्योती साईटिफिक ट्रडिङ कन्सर्नको गोदामबाट औषधि तथा सर्जिकल सामान चोरी गर्ने ४ जना पक्राउ परेका छन्।
प्रहरीले आइतबार राती सानोथिमीका २२ वर्षीय रिजन थापामगर सहित ४ जनालाई पक्राउ गरेको जनाएको छ।
उनीहरुले पुस २५ गते उक्त गोदामबाट औषधी तथा सर्जिकल सामानहरु थापामगरको घरमा लुकाइ छिपाइ राखेका थिए।
विशेष सूचनाको आधारमा महानगरीय प्रहरी वृत्त थिमी भक्तपुरबाट खटिएको प्रहरीले उनीहरुलाई आइतबार राती पक्राउ गरेको हो। उनीहरुले चोरी गरी थापामगरको घरमा लुकाइ छिपाइ राखेको ३५ थान इथानोल एप्सुलेट ए ग्रेड र १० थान अक्सिज फाइन एजस्टमेन्ट भल्भ लगायतका विभिन्न औषधि तथा सर्जिकल सामान प्रहरीले बरामद समेत गरेको छ।
उनीहरुमाथि थप अनुसन्धान भइरहेको महानगरीय प्रहरी वृत्त थिमी भक्तपुरले जनाएको छ।
