काठमाडौं- नेपाल औषधि व्यवसायी संघको आसन्न निर्वाचन तथा अधिवेशन प्रक्रिया तत्कालका लागि स्थगित भएको छ। उच्च अदालत पाटनले संघको मतदाता नामावली, निर्वाचन कार्यतालिका तथा सोसम्बन्धी सम्पूर्ण प्रक्रिया हाललाई यथास्थितिमा राख्न अल्पकालीन अन्तरिम आदेश जारी गरेसँगै निर्वाचन रोकिएको हो।
नेपाल औषधि व्यवसायी संघको १५औँ राष्ट्रिय अधिवेशन यही मंसिर ५ र ६ गते कर्णालीको सुर्खेतमा हुने कार्यतालिका तय गरिएको थियो। तर, अधिवेशनको तीन दिनअघि अदालतले प्रक्रिया यथास्थितिमा राख्न आदेश दिएपछि निर्वाचन तत्काललाई स्थगित भएको हो।
निवेदक लक्ष्मी प्रसाद तिम्सिनाले जिल्ला प्रशासन कार्यालय काठमाडौं, नेपाल औषधि व्यवसायी संघको केन्द्रीय कार्यालय, संघको निर्वाचन समितिको केन्द्रीय सचिवालय, प्रमुख निर्वाचन अधिकृत शिवराज धिताल तथा केन्द्रीय सहायक कार्यालय प्रमुख गणेश पुडासैनीलाई विपक्षी बनाई दायर गरेको उत्प्रेषण मुद्दामा अदालतले यस्तो आदेश दिएको हो।
न्यायाधीश शिवबहादुर रानाभाटको एकल इजलासले २०८३ मंसिर २ गते निवेदकका तर्फबाट अधिवक्ता प्रविण सुवेदीको बहस सुनेपछि विपक्षीका नाममा कारण देखाऊ आदेशसँगै अल्पकालीन अन्तरिम आदेश जारी गरेको छ।
यस्तो छ अदालतको आदेश:
अदालतको आदेशमा भनिएको छ, 'निवेदकले अन्तरिम आदेश माग गरेको सन्दर्भमा हेर्दा, दुवै पक्षको छलफलबाट निष्कर्षमा पुग्न उपयुक्त हुने देखिएकोले सो प्रयोजनको लागि मिति २०८३।०८।०८ गतेको पेसी तोक्नु। उक्त मितिसम्मका लागि मिति २०८३।०७।१७ र १८ मा प्रकाशित मतदाता नामावली, निर्वाचन कार्यतालिका र सोसम्बन्धी सम्पूर्ण प्रक्रिया हाललाई यथास्थितिमा राख्नू भनी उच्च अदालत नियमावली, २०७३ को नियम ४२(१) बमोजिम विपक्षीहरूका नाउँमा अल्पकालीन अन्तरिम आदेश जारी गरिदिएको छ।'
यसका साथै अदालतले निवेदनको मागबमोजिमको आदेश किन जारी हुनु नपर्ने हो भन्ने आधार, कारण र प्रमाणसहित म्याद सूचना तामेल भएको मितिले बाटाको म्यादबाहेक १५ दिनभित्र लिखित जवाफ पेस गर्न विपक्षीहरूलाई आदेश दिएको छ। विपक्षी नं. १ को हकमा उच्च सरकारी वकिल कार्यालय, पाटनमार्फत र विपक्षी नं. २, ३, ४ तथा ५ को हकमा आफैँ वा कानुनबमोजिमको प्रतिनिधिमार्फत लिखित जवाफ पेस गर्न भनिएको छ।
अब आगामी मंसिर ८ गते हुने दुवै पक्षको छलफलपछि अदालतले अन्तरिम आदेशलाई निरन्तरता दिने वा नदिने भन्ने विषयमा टुंगो लगाउनेछ।
हेरौं आदेश
