डा यम बहादुर रोका न्युरोसर्जन हुन्। हाल उनी विराटनगरस्थित न्युरो अस्पतालका विभागीय प्रमुख समेत हुन्। केही समय अघि उनका ८ वटा कवितासंग्रहहरु प्रकाशित भएका छन्। फोनिक्स बुक्सले उनका १०८ कविताका ८ वटा भोलुम्स बजारमा ल्याएको हो। कविताकै अन्य थप ४ भोलुम्सहरु प्रकाशन हुने अवस्थामा छन्। उनै डा रोकासँग स्वास्थ्यखबरकी अन्शु खनालले गरेको पुस्तक वार्ता:
पाठकहरुबाट कविता संग्रहको प्रतिक्रिया कस्तो पाईरहनु भएको छ?
अहिलेसम्म पढेकाहरुले सकारात्मक प्रतिक्रिया नै दिईरहनु भएको छ।
कवितासँगै अन्य पुस्तकको पनि तयारीमा हुनुहुन्छ कि?
मेरो कविताको १२ भोलुम्ससम्म प्रकाशनको लागि ठिक्क भईसकेको छ। एउटा ननफिक्सन पनि प्रकाशनको अन्तिम चरणमा छ।
तपाईंलाई लेखनमा रुची कहिलेदेखि लाग्यो?
मलाई स्कुल पढ्दादेखि नै लेख्न मन पर्थ्यो। आफ्नो पेशाको व्यस्तताले बिचमा लामो समय लेखाई छुटे जस्तो भएको थियो। कोरोनाको समयदेखि यता अहिले नियमित जस्तो लेखिरहेको छु।
कुन समयमा लेख्नुहुन्छ?
म प्राय: लन्च ब्रेकमा, बिदाको दिन, काम सकिएपछिको समयमा लेख्छु।
आफू चाहिं कस्तो किताब पढ्न रुचाउनु हुन्छ?
म फरकफरक विषयवस्तुका भएका किताबहरु पढ्ने गर्छु। विशेष गरि एडभेन्चर्स, स्टोरी, कार्टुनहरु पढ्छु।
लेखन बाहेक अरु के-के कुरामा तपाईको रुची छ?
लेखन बाहेक मलाई पुरानो गितहरु सुन्न, चित्र बनाउन र घुम्न पनि मन पर्छ। पहिलेपहिले म चित्रहरु पनि बनाउने गर्थें। आजकल समय मिलेको छैन।
तपाईंले पछिल्लो समय पढेको किताब कुन हो?
अहिले मैले इड योङद्वारा लिखित 'एन इमेन्स वर्ल्ड' पढिरहेको छु।
तपाईं अंग्रेजीमा भाषामा किन लेख्नु हुन्छ?
मलाई नेपाली भन्दा अंग्रेजीमा लेख्न सहज लाग्छ। मेरो पढाई र हुर्काइ पनि नेपालमा भन्दा धेरै भारतमा भयो। मलाई पहिल्यैबाट अंग्रेजीमा लेख्न सहज लाग्थ्यो।
किताब किन पढ्ने?
किताब पढ्नु राम्रो बानि हो जस्तो लाग्छ। फरकफरक किताबमा फरकफरक कुराहरु हुन्छन्। जसबाट मान्छेले धेरै ज्ञान प्राप्त गर्न सक्छन्। किताब समाज बुझ्ने माध्यम हो। बच्चाहरु देखि नै किताब पढ्ने बानि लगाउनु पर्छ।
अन्त्यमा केही भन्न चाहनु हुन्छ?
मेरो विचारमा नेपाली साहित्य धेरै नै माथी छ। अंग्रेजीमा चाहिं हामी अलिक पछाडी नै छौँ जस्तो लाग्छ। मैले कविता छाप्न खोज्दा पनि धेरै पब्लिकेशनहरुले अंग्रेजी धेरैले पढ्न खोज्दैनन् भन्नु भएको थियो। अंग्रेजी भाषामार्फत हाम्रो परिवेश, समाज, समस्या लेख्दा विश्वका धेरै देशका मानिसहरुले बुझ्न सक्छन्। त्यो परिवेश बुझ्न सक्छन्। नेपालमा बसेर अंग्रेजीमा भाषामा लेख्नेलाई पनि हामीले साथ दिनुपर्छ।
