धनगढी- अत्यधिक गर्मीले सुदूरपश्चिम तराई क्षेत्रको जनजीवन कष्टकर बनेको छ। कैलाली लगायतका जिल्लामा बढेको गर्मीका कारण दैनिक काम गर्न र हिँड्डुल गर्न कठिन भएको छ।
धनगढीको अधिकतम तापक्रम ४२ डिग्री सेल्सियस पुगेको छ। गर्मीले मजदूर वर्ग, वृद्धवृद्धा र स्कुले बालबालिका बढी प्रभवित भएका छन्। गर्मी बढेसँगै बजार क्षेत्र दिउँसो सुनसान हुन थालेको छ।
‘गर्मी बढेसँगै दिनमा १०/१२ पटक विद्युत् आउने-जाने भइरहेको छ। विद्युत् गएपछि पङ्खा चलाउन नपाउँदा झन् गाह्रो हुन्छ,’ धनगढीका स्थानीय भूमिराज अवस्थीले भने।
गर्मीले धनगढीका अस्पतालमा पखाला, बान्ता, ज्वरो र टाइफाइडका बिरामीको सङ्ख्या बढेको सेती प्रादेशिक अस्पतालका डा प्रदीप मिश्रले जानकारी दिए।
मध्याह्नमा तातो हावा चल्ने गरेकाले यसबाट बालबालिकालाई जोगाउन र झोलिलो खानेकुरा खुवाएर शरीरमा तरल पदार्थको मात्रा बढाउन डा मिश्रले सल्लाह दिए। मौसम अनुसार सागपात र फलफूल सेवन गर्ने, सडेगलेका, बासी र जथाभावी राखिएका खानेकुरा नखान पनि चिकित्सकको सुझाव छ।
