धनगढी- नेपाल आयुर्वेदिक औषधी व्यवसायी संघ सुदूरपश्चिम प्रदेश कमिटीको अध्यक्षमा दीपक गौतम चयन भएका छन्।
प्रथम सुदूरपश्चिम प्रादेशिक अधिवेशन समारोहबाट गौतमको अध्यक्षतामा १३ सदस्यीय कार्य समिति चयन गरिएको हो। उपाध्यक्षमा महेशकुमार खड्का, महिला उपाध्यक्षमा मेनुका मिश्र, सचिवमा नवराज खनाल, सहसचिवमा लौटन डंगौरा, कोषाध्यक्षमा डम्बरी पनेरु रहेका छन्।
हरिद्वारी कठरिया, हेमा महरा, जगदीश जोशी, तीर्थराज कलौनी, दिनेशकुमार खडका, बसन्तबहादुर धामी र विनोद बन्जाडे सदस्यमा चयन भएका छन्।
शनिबार भएको प्रथम अधिवेशनको सुदूरपश्चिम प्रदेश संसदीय उपसमिति सामाजिक विकास समितिका सभापति कुन्ति जोशीले उद्घाटन गरेकी थिइन्। सो अवसरमा बोल्दै उनले आयुर्वेदिक व्यवसायीले इमान्दार भएर गुणस्तरीय औषधी बिक्री वितरण गर्नमा ध्यान दिनुपर्ने सुझाव दिइन्।
उनले आम नागरिकमा आयुर्वेदिक औषधिप्रति विश्वास जगाउन जरुरी रहेको बताइन्। प्रदेश सरकारले आयुर्वेद्धिक सेवालाई विस्तार गर्न आवश्यक कानुन, नीति निर्माण गरिरहेको उनको भनाइ छ।
‘प्रदेशमा चिकित्सा शिक्षालाई अगाडि बढाउन प्रदेश सभाबाट सुदूरपश्चिम आयुर्वेद प्रतिष्ठान स्थापना र संचालन सम्बन्धी विधेयक पारित गरिसकेका छौं,’उनले भनिन्, ‘विधेयकमा भएका नियम, उपनियमको सबैले अपनत्व हुने गरेर कार्यान्वयन गर्नुपर्छ।’
नेपाल आयुर्वेदिक औषधि व्यवसायी संघका केन्द्रीय अध्यक्ष जंगराज गिरीले आयुर्वेदिक औषधि व्यवसायीको संगठन नहुँदा व्यवसायीमा देखिएका समस्या, विकृति हट्न नसकेको बताए। उनले नेपालमा झन्डै चार हजार बराबर आयुर्वेदिक औषधी व्यवसायी भए पनि थोक व्यवसायी न्यून रहेको बताए।
‘पहिला व्यवसायीबीच एकता गराउँछौं। व्यवसायीभित्र भएका विकृति तथा विसंगतिको पहिचान गरी त्यसको अन्त्य र राज्यले व्यवसायीका लागि ल्याउनुपर्ने नीतिमा पहल गर्ने यस कार्यसमितिको उद्देश्य रहेको छ,’ उनले भने।
धनगढी उपमहानगरपालिका-३ का वडा अध्यक्ष बलबहादुर ऐरले जडिबुटीको पहिचान, उत्पादन तथा प्रयोगमा जोड दिइनुपर्ने सुझाव दिए।
सामाजिक विकास मन्त्रालय आयुर्वेद्धिक महाशाखा प्रमुख डाक्टर चेतराज जोशीले ईर्मेजेन्सी तथा अप्रेसनबाहेकका अन्य रोगहरुमा आयुर्वेद्धिक औषधीको प्रयोग गरेर नियन्त्रण गर्न सकिने बताए।
