काठमाडौं — छाला तथा कपाल प्रत्यारोपण विशेषज्ञ डा. रुपक घिमिरेले आफ्नै टाउकोमा दोस्रोपटक कपाल प्रत्यारोपण गराएका छन्। काठमाडौंको दरबारमार्गस्थित आवरण स्किन एन्ड हेयर क्लिनिकमा आज भएको प्रत्यारोपण प्रक्रिया डा. तपन प्रधानको नेतृत्वमा सम्पन्न भएको हो।
डा. घिमिरेले यसअघि सन् २०१७ जनवरी २८ मा पहिलोपटक कपाल प्रत्यारोपण गराएका थिए। पहिलो प्रत्यारोपणको करिब नौ वर्षपछि उनले पुनः यो प्रक्रिया गराएका हुन्।
कपाल प्रत्यारोपणको क्षेत्रमा व्यावसायिक रूपमा सक्रिय डा. घिमिरेको यो निर्णयलाई उपचार प्रक्रियासँग जोडिएको व्यक्तिगत अनुभवका रूपमा हेरिएको छ। कपाल प्रत्यारोपणबारे बिरामीलाई परामर्श दिने चिकित्सक आफैँले पनि यो प्रक्रिया गराउनु यससम्बन्धी व्यक्तिगत अनुभव र व्यावहारिक पक्षबारे चर्चा गर्ने अवसर बनेको छ।
कपाल झर्ने समस्या उमेर, वंशाणुगत कारण तथा अन्य स्वास्थ्य अवस्थासँग सम्बन्धित हुन सक्छ। कपाल प्रत्यारोपण उपयुक्त हुन्छ वा हुँदैन भन्ने निर्णय गर्दा कपाल झर्ने अवस्था, डोनर क्षेत्रको उपलब्धता, अपेक्षित परिणाम र भविष्यमा थप कपाल झर्न सक्ने सम्भावनाको मूल्याङ्कन महत्त्वपूर्ण हुन्छ।
कपाल प्रत्यारोपणपछि प्राप्त परिणाम व्यक्तिअनुसार फरक हुन सक्छ। त्यसैले प्रक्रियाअघि उपयुक्त चिकित्सकीय परामर्श, यथार्थपरक अपेक्षा र दीर्घकालीन कपाल व्यवस्थापनबारे जानकारी लिनु आवश्यक हुन्छ।
दरबारमार्गस्थित आवरण स्किन एन्ड हेयर क्लिनिकमा छाला तथा कपालसम्बन्धी विभिन्न सेवा प्रदान हुँदै आएको छ। डा. घिमिरेले सन् २०१५ देखि कपाल प्रत्यारोपणको क्षेत्रमा काम गर्दै छन्।
