काठमाडौं- औषधि व्यवस्था विभागले सामाजिक सञ्जलामार्फत औषधिको भ्रामक प्रचार नगर्न चेतावनी दिएको छ।
विभागले सार्वजनिक सूचना जारी गर्दै फेसबुक, टिकटकलगायत माध्यमबाट मधुमेह, मोटोपन, प्रोस्टेट, थाइराइड, युरिक एसिड यौनशक्ति बढाउने क्यान्सर जस्ता विभिन्न रोग निको पार्ने दाबी गर्दै अप्रमाणित औषधिको विज्ञापन गरेर नबेच्न विभागले विक्रेतालाई चेतावनी दिएको हो।
'सामाजिक संजालका फेसबुक, टिकटक लगायतका माध्यम मार्फत मधुमेह, मोटोपन, प्रोस्टेट, थाइराइड, युरिक एसिड, यौनशक्ति बढाउने, क्यान्सर जस्ता रोग समेत निको पार्ने भनि दाबी गरिएका औषधिजन्य पदार्थहरूको विधुतीय संजाल मार्फत भ्रमात्मक विज्ञापन गरी अनियन्त्रित बिक्री भएको पाइएकोमा विभागको ध्यानाकर्षण भएको छ,' विभागद्वारा जारी सूचनामा भनिएको छ, 'औषधिसँग मिल्दोजुल्दो नाम राखी औषधिकै रुपमा प्रचार प्रसार सिफारिस, ओसारपसार एवं बिक्री वितरण साथै प्रयोग भए गरेको पाइएकोले यस प्रकारका औषधि ऐन, २०३५ विपरितका काम/कारवाही नगर्न/नगराउनु हुन सूचना प्रकाशित गरिएको छ।'
विभागले विभागमा दर्ता नभएका र कुनै वैज्ञानिक आधार नभएका औषधिको प्रयोगले स्वास्थ्यमा गम्भीर असर निम्त्याउने भन्दै यस्ता सामग्री प्रयोग नगर्न पनि सजग गराएको छ। विभागले मधुमेह, मोटोपन, प्रोस्टेट, युरिक एसिड निको हुने तथा यौनशक्ति बढाउने नाममा भएका सामाजिक सञ्जालमा प्रचार भइरहेका यस्ता उत्पादनहरु विभागमा दर्ता नभएको पनि उल्लेख गरेको छ।
'विभागमा दर्ता नभएका साथै उक्त उत्पादनहरूको कुनै प्रमाणित वैज्ञानिक आधार समेत नभएको देखिन्छ। प्रयोगशालाहरुको रिपोर्टका आधारमा यस प्रकारका औषधिहरु र तिनका समिश्रणहरुको प्रयोगबाट मानवीय स्वास्थ्यमा थप जटिल समस्या देखिने गरेको प्रमाण एवंम् तथ्यहरु पाइएको छ। उदाहरणका लागि Garcinia Cambogia को प्रयोगबाट Lead Poisoning, Severe Abdominal Pain, Constipation जस्ता सामान्य देखि गम्भीर किसिमका असर प्रतिअसरहरू बिरामीमा देखिने गरेको पाइएको छ। यौनशक्ति बढाउने दाबी सहित बजारमा ल्याइएका कतिपय उत्पादनहरुमा यौन दुर्बलता हटाउन प्रयोग हुने औषधि सिल्डेनाफिलको समिश्रण रहेको भेटिएका छन्। सोको अत्यधिक प्रयोगबाट मानव स्वास्थ्यमा हानि पुर्याउनुका साथै मृत्यु समेत हुन सक्दछ,'
