पोखरा- कास्की प्रहरीले पोखरा महानगरपालिका–२६ कालिकाचोकस्थित एक फार्मेसी सञ्चालिकालाई लागूऔषध काराेबार आरोपमा पक्राउ गरेको छ।
जिल्ला प्रहरी कार्यालय कास्कीका अनुसार लागूऔषध ओसारपसार भइरहेको भन्ने सूचनाका आधारमा प्रहरीले बुधबार साँझ करिब ७ बजे इलाका प्रहरी कार्यालय शिशुवाबाट खटिएको टोलीले जलधारे फार्मेसीमा जाँच गरेको थियो।
जाँचका क्रममा फार्मेसी सञ्चालिका २९ वर्षीया अमिसा ढुङ्गानाको साथबाट कोडिन कोडिप–पी ६ हजार ४०० चक्की, प्रेगाबालिन ४५० चक्की, लोराजेपाम १५० चक्की र क्लोर्डियाजेपोक्साइड १६० चक्की बरामद भएको प्रहरीले जनाएको छ। जुन नियन्त्रित औषधि हुन्।
डाक्टरको सिफारिसपश्चात् मात्र बिक्री–वितरण गर्नुपर्ने औषधिलाई नियन्त्रित औषधि भनिन्छ । यस्तो औषधि डाक्टरको सिफारिसविना बिक्री–वितरण गर्न पाइँदैन । सिफारिसबिना बिक्री गर्दा यस्ता औषधि लागुपदार्थ सेवन गर्ने मानिसले लागुपदार्थको रूपमा सेवन गर्ने गरेको पाइएको छ ।
प्रहरीले उनलाई नियन्त्रणमा लिएर लागूऔषधसम्बन्धी कसुरमा अनुसन्धान प्रक्रिया अगाडि बढाएको जिल्ला प्रहरी कार्यालय कास्कीले जनाएको छ।
जिल्ला प्रहरी कार्यालय कास्कीका सूचना अधिकारी प्रहरी नायब उपरीक्षक वीरेन्द्रकुमार पासवानले बिहीबार जारी गरेको प्रेस विज्ञप्तिमा उक्त विवरण उल्लेख छ। *यसअघि हेडलाइनमा अन्यथा भएकाले सच्याइएकाे छ।
