धेरै मानिसलाई चुरोटले फोक्सोको क्यान्सरमात्र हुन्छ भन्ने लाग्छ । तर चुरोट सेवनले क्यान्सरभन्दा हर्टअट्याकको सम्भानवा बढि हुन्छ । चुरोटले हर्टअट्याक हुन्छ भन्ने तथ्य सन् १९४० मा प्रमाणीत भएको हो ।
चुरोटले रक्तनलीहरुको भित्री भित्तामा कलेस्टेरोल जम्मा गराउछ । चुरोटले रगतलाई बाक्लो बनाएर जम्ने संभावना बढाउछ । चुरोट सेवनले नराम्रो कोलेस्टेरोल (एलडिएल) बढाउछ र राम्रो कोलेस्टेरोल (एचडिएल) घटाउछ । यसले मुटुको रक्तनलीहरु साँघुरो बनाउन सक्छ । चुरोटमा हुने निकोटिनले मुटुको धडकनको गति र रक्तचाप बढाउछ । चुरोटका कारण हुने यस्ता परिवर्तनले मुटुको रक्तनलीमा रगत जमेर मुटुको रक्तसञ्चारमा बाधा पुग्छ र हर्टअट्याक हुन्छ । ब्रिटेनमा भएको एक अध्ययनअनुसार चुरोट सेवनगर्ने ३० देखी ५० वर्ष उमेरका मानिसमा चुरोट सेवन नगर्ने भन्दा हर्टअट्याकको सम्भावना ५ गुणा बढि हुन्छ । अमेरिकामा प्रत्येक ५ मृत्युमध्ये एक चुरोट सेवनका कारणले हुने अध्ययनले देखाएको छ ।
चुरोट सेवनले उच्च रक्तचाप (हाइ ब्लड प्रेसर) को सम्भावना अधिक हुन्छ । चुरोटका कारणले भएको उच्च रक्तचाप नियन्त्रण गर्न पनि निकै गाहे हुन्छ । हर्टअट्याकको सम्भावना चुरोट छाडेको दिन देखी नै घट्दै जान्छ । चुरोट छाडेको १० वर्षमा हर्टअट्याकको सम्भावना चुरोट कहिल्यै सेवन नगर्ने सरह हुनपुग्छ । चुरोटले ब्रेनअट्याक, दम, क्यान्सर, बाझोपन र हड्डी कमजोर हुने रोगपनि गराउछ ।
