काठमाडौं– प्रधानमन्त्री केपी शर्मा ओलीले नेपाल कोरोना भाइरस विरुद्धको लडाइँमा होमिएको बताएका छन्। नेपालमा अहिलेसम्म ९ जनामा मात्रै संक्रमण भए पनि उच्च जोखिम कायमै रहेको उनले बताएका छन्।
राष्ट्रका नाममा सम्बोधन गर्दै प्रधानमन्त्री ओलीले श्रमिक, व्यवसायी र विद्यार्थीमा लकडाउनका कारण परेको प्रभाव प्रति आफू सम्बेदनशील रहेको पनि बताएका छन्।
प्रधानमन्त्री ओलीले लकडाउनलाई पूर्ण पालना नगर्ने हो भने जोखिम अझै बढ्न सक्ने पनि बताए।
सीमित पूर्वाधार र स्वास्थ्य सामग्रीको सीमितताका बीच सेवामा खट्ने स्वास्थ्यकर्मीसहित राष्ट्रसेवकको भूमिका प्रसंशनीय रहेको उनले उल्लेख गरेका छन्।
प्रदेश र स्थानीय तहको भूमिका प्रभावकारी रहेको भन्दै जनप्रतिनिधिको भूमिकाप्रति सम्मान व्यक्त गरेका छन्। उनले स्थानीय समुदाय र सामाजिक संघसंस्थाको भूमिकाप्रति पनि उनले सम्मान व्यक्त गरेका छन्।
नेपालमै कोरोना संक्रमण भएसँगै नेपाल दोस्रो चरणको जोखिममा परेको उनले बताए। प्रधानमन्त्री ओलीले रोकमथाम र नियन्त्रणका लागि उच्चस्तरीय समिति र सिसिएमसीले काम अघि बढाइरहेको बताए।
पहिचान, परीक्षण र उपचारका लागि ४ वटा संरचना खडा गरिएको उनले बताए। ओलीले सबैको साझेदारीमा सिसिएमसी सञ्चालन हुने पनि उनले बताए।
मुलुकभर २० हजार ५ सय ६६ जनालाई राख्न सक्ने गरी क्वारेन्टाइन तयार रहेको पनि उनले बताए। ९ हजार क्वार्नटाइनमा रहेको र ३ हजार आइसोलेसन बेड रहेकोमा ९५ जना रहेको पनि उनले बताए।
प्रधानमन्त्री ओलीले संक्रमण फैलिन नदिन सबै शक्ति परिचालन गरिरहेको उनले बताए। उनले सोमबारसम्ममा १८ सय जनाको परीक्षण गरिएको बताए। र्यापिड डिटेक्सन टेस्टमार्फत हजारौँको उपचारको तयारी गरिएको पनि उनले बताए।
प्रधानमन्त्री ओलीले सरकार सकभर संक्रमण फैलिन नदिन र फैलिहालेमा पूर्ण नियन्त्रण गर्न तयारी अवस्थामा रहेको बताएका छन्।
'हामी अझै पनि उच्च जोखिममा छँदैछौं', उनले भने।
उनले मुलुक दुई सातादेखि मुलुक लक डाउनमा रहेको बताउँदै त्यसबाट परिरहेको दुःखप्रति सहानुभूति व्यक्त गरे। 'महामारीका विरुद्ध लकडाउन अपरिहार्य कदम हो भन्ने हामी सबैलाई थाहा छ', उनले भने।
उनले लकडाउनको बाँकी अवधिका लागि पनि धैर्यता र सहयोगका लागि अनुरोध गर्छु।
उनले संकटको घडीमा जो जहाँ छौं त्यहीँ बस्न आग्रह गरे।
