बाली (इन्डोनेसिया)- एसिया–प्यासिफिक क्षेत्रमा सुर्तीजन्य पदार्थ नियन्त्रण, सार्वजनिक स्वास्थ्य नीति र रणनीतिक नेतृत्व विकास गर्ने उद्देश्यले आयोजित ‘एसिया–प्यासिफिक सब–रिजनल लिडरसिप प्रोग्राम’ सफलतापूर्वक सम्पन्न भएको छ।
यस क्षेत्रका विभिन्न देशहरूबाट सार्वजनिक स्वास्थ्य विज्ञ, नीति निर्माता, तथा सुर्तीजन्य पदार्थ नियन्त्रण अभियानका अभियन्ताहरूको सहभागिता रहेको उक्त कार्यक्रममा सुर्तीजन्य नियन्त्रणसम्बन्धी नीतिहरूलाई थप प्रभावकारी बनाउने विषयमा गहन छलफल गरिएको थियो।
कार्यक्रममा एसिया–प्यासिफिक क्षेत्रमा सुर्तीजन्य उद्योगका रणनीतिहरूको सामना गर्न, युवापुस्तालाई सुर्तीजन्य पदार्थको कुलतबाट बचाउन तथा जनस्वास्थ्य नीति निर्माणमा नेतृत्वदायी क्षमता अभिवृद्धि गर्ने विषयलाई मुख्य प्राथमिकता दिइएको थियो। विशेष गरी न्यून तथा मध्यम आय भएका देशहरूमा सुर्तीजन्य पदार्थ सेवनबाट हुने असर र त्यसलाई न्यूनीकरण गर्न क्षेत्रीय तहमा हुनुपर्ने सहकार्यबारे विस्तृत मन्थन गरिएको थियो।
सहभागी विज्ञ तथा नेतृत्वकर्ताहरूले सुर्तीजन्य पदार्थ नियन्त्रणसम्बन्धी विश्वव्यापी महासन्धिको कार्यान्वयनलाई थप तीव्र पार्नुपर्नेमा जोड दिएका थिए। साथै, सार्वजनिक स्वास्थ्यको क्षेत्रमा नीतिगत वकालत, अनुसन्धान र रणनीतिक साझेदारीलाई बलियो बनाउँदै स्वास्थ्यमैत्री समाज निर्माणका लागि आआफ्नो तर्फबाट प्रतिबद्धता व्यक्त गरिएको छ।
यस प्रकारका नेतृत्व विकास तथा सहकार्यमूलक कार्यक्रमले एसिया–प्यासिफिक क्षेत्रमा सुर्तीजन्य नियन्त्रणका एजेन्डाहरूलाई प्रभावकारी रूपमा कार्यान्वयन गर्न महत्त्वपूर्ण टेवा पुग्ने विश्वास आयोजकले लिएका छन्।
