काठमाडौं- काठमाडौंको तारकेश्वर नगरपालिका-७ साङ्लेखोलास्थित एक फार्ममा टर्की चरामा बर्डफ्लू देखिएको छ। टर्की फार्ममा बर्डफ्लू दखिएपछि दुई हजार ५ सय ४४ वटा हाँस, खुकुरा, बट्टाई र टर्की नष्ट गरिएको पशु सेवा विभागले जानकारी दिएको छ।
फार्ममा बर्डफ्लू पुष्टि भएपछि १८६५ हाँस, ६२२ बट्टाइ, ३२ कुखुरा, २५ टर्की, ५४२ अण्डा र ७५ केजी दाना नष्ट गरिएको विभागले जारी गरेको प्रेस विज्ञप्तिमा उल्लेख छ। अहिले उक्त फार्मलाई शिल गरिएको छ। बर्डफ्लू प्रभावित क्षेत्रका कुखुरा फार्ममा चुना र ‘भिर्काेन’ छर्ने काम भइरहेको छ।
स्वास्थ्य मन्त्रालयअन्तर्गतको इपिडिमियोलोजी तथा रोग नियन्त्रण महाशाखाले हाँस, खुकुरा र टर्की चरा नष्ट गर्ने काम गरेका १० जनालाई निगरानीमा राखिएको जनाएको छ। महाशाखाले ती व्यक्तिलाई कम्तिमा सात दिन निगरानी राखी उनीहरुको स्वास्थ्य स्थितिबारे जानकारी लिने बताएको छ।
‘तारकेश्वरमा टर्की चरामा बर्डफ्लू देखिएको हो। २५ सयभन्दा बढी चराहरू नष्ट गर्ने काममा संलग्नलाई जोखिम नहोस् भनेर निगरानीमा राखिएको छ,’ महाशाखाका वरिष्ठ मेडिकल सुपरिटेन्डेन्ट डा हेमन्त ओझाले भने।
नेपाल अहिलेसम्म एक जना व्यक्तिमा मात्र बर्डफ्लू पुष्टि भएको छ। काभ्रेका एक पुरुषमा बर्डफ्लू देखिएको थियो।